Job 16
1 約伯應講：
2 這種話𠊎已經聽多了；你等个安慰反轉帶來痛苦。
3 這兜空話還講毋會煞係麼？這兜話你莫講敢做毋得麼？
4 若係換你等堵到𠊎所堵到个，你等所講个該兜話𠊎乜會講。𠊎共樣會像你等恁樣緊搖頭，編一大堆个理論來責備你等。
5 𠊎會用好聽个話鼓勵你等，也會用嘴唇皮來安慰你等。
6 𠊎雖然講話，痛苦毋會停；若係恬恬，𠊎个痛苦還在。
7 上帝啊，你使𠊎痶到半生死；你使𠊎家破人亡。
8 係你捉到𠊎；係你攻擊𠊎。這下𠊎只有賸到皮包骨；別人就講這證明𠊎有罪。
9 上帝在發譴中擘爛𠊎；佢咬牙切齒來攻擊𠊎；𠊎个仇敵目瞋瞋看𠊎。
10 人一開嘴黏時嘲謔𠊎。佢等打𠊎嘴角侮辱𠊎；佢等聯合起來攻擊𠊎。
11 上帝將𠊎交給罪人；將𠊎㧒落壞人手中。
12 𠊎本來生活安定，總係上帝攻擊𠊎；佢揢等𠊎个頸筋，將𠊎㧹到碎碎。佢將𠊎準箭靶，
13 佢个弓箭手四面包圍𠊎；佢个箭射到𠊎个腰圈，𠊎个肝膽流到地泥下；該時佢還係無憐憫𠊎。
14 佢一擺又一擺打傷𠊎；佢像勇士恁樣攻擊𠊎。
15 𠊎悲傷，袈等一領麻衫；𠊎失志，坐在火灰當中。
16 𠊎噭到面紅紅；𠊎个目珠腫腫，目珠圈也烏烏。
17 總係𠊎並無犯麼介大罪；𠊎个祈禱也係誠心實意。
18 地啊，毋好將𠊎个血揜等！莫俾𠊎喊个冤枉聲恬掉！
19 𠊎个證人這下在天頂；𠊎个中保愛為𠊎講話。
20 𠊎該兜朋友一直恥笑𠊎；𠊎在上帝面前目汁濫泔。
21 希望中保為𠊎向上帝辯護，像人為佢个朋友辯護恁樣。
22 因為過幾年，𠊎就愛行該條路；人行該條路，一定毋會倒轉來。