Job 19
1 約伯應講：
2 你等愛害𠊎悲傷到幾時？用話語來蹧踏𠊎到幾久？
3 你等一擺又一擺侮辱𠊎；恁樣欺負𠊎乜毋會見笑。
4 就算𠊎正經有毋著，𠊎个毋著自家承擔。
5 你等恅到自家比𠊎較良善，將𠊎个痛苦準做𠊎犯罪个證據。
6 愛知係上帝使𠊎受苦；係佢鋪羅網來包圍𠊎。
7 𠊎喊冤枉，無人應𠊎；𠊎求公正，無人插𠊎。
8 上帝攔等𠊎，毋俾𠊎過；佢使烏暗遮等𠊎个路。
9 佢搶𠊎个尊榮，破壞𠊎个名聲。
10 佢對四面八方攻擊𠊎，將𠊎个希望連根挷掉。
11 上帝向𠊎發譴，將𠊎準做仇敵。
12 佢派軍隊歸陣來攻擊𠊎，在𠊎帳篷堘安營圍困𠊎。
13 上帝使𠊎該兜兄弟離開𠊎；𠊎熟事个人看𠊎做過路客。
14 𠊎个親人全部㧯𠊎無來往，𠊎个朋友攏總毋記得𠊎了。
15 住過𠊎屋下个人客看𠊎做外人；連該兜使女也將𠊎看做生份人。
16 𠊎喊僕人，佢毋應𠊎；求佢幫助，也毋搭𠊎。
17 𠊎透氣當臭，吾𡜵娘鼻到驚；𠊎个兄弟也毋願意行兼𠊎。
18 連細人仔也全部看輕𠊎；𠊎一䟘起來，佢等就笑𠊎。
19 𠊎最相好个朋友惱𠊎；最惜个人也對𠊎變面。
20 𠊎歸身皮包骨，賸一口氣定定。
21 𠊎个朋友啊，可憐𠊎！可憐𠊎！因為上帝个手已經打橫𠊎。
22 做麼介你等愛像上帝恁樣刑罰𠊎？你等加給𠊎个痛苦還毋罅重係麼？
23 𠊎十分希望有人記錄𠊎講過个話，將𠊎个話全部寫做書！
24 抑係用鐵雕刻，用鉛鑄字，鑲在磐石頂，保存到永遠。
25 總係，𠊎知𠊎个救贖主還在；最後，佢會來為𠊎伸冤。
26 就算𠊎个皮肉被病痛敗壞，斷氣以前，𠊎還係會看到上帝。
27 𠊎會親目看到佢，佢對𠊎並無生份。𠊎个心肝渴慕到昏掉！
28 你等樣講：「𠊎等愛樣般來蹧踏佢？佢堵到災禍原因還係在佢自家。」
29 𠊎警告你等：愛驚刀劍；這刀劍帶來上帝對罪个大發譴。你等愛知有一位審判个上帝。