Jeremiah 49
1 有關亞捫人，上主恁樣講：「以色列个男人在㖠位？以色列个後代在㖠位？做麼介由在該兜拜米勒公个人承接迦得支族个土地，住在其中个城市呢？
2 看啊，日仔會到，𠊎—上主愛使住在首都拉巴个亞捫人聽到戰亂中盡喊个聲。拉巴會成做荒埔，屬它个鄉村會被火燒掉。然後以色列人會對侵略佢等个人手中收轉自家个土地。𠊎—上主恁樣宣佈了。
3 希實本人啊，愛傷心盡噭！因為艾城毀滅了！拉巴个婦人家啊，愛大聲噭！愛著麻衫哀傷，在城牆內到處撞來撞去！你等个神明米勒公㧯佢个祭司、領袖會共下被人捉走。
4 悖逆个國民啊，做麼介誇口你等个力量像山壢充滿水呢？做麼介偎靠自家个財寶，恅到無人敢來搶？
5 𠊎—至高个上主、萬軍个元帥愛使得人畏个事圍等你，你等全部會逃走。逐儕顧自家个命，無人有辦法將失敗个軍隊重新組織起來。
6 「總係，有一日，𠊎愛俾亞捫人轉去，重整家園。𠊎—上主恁樣宣佈了。」
7 有關以東，上主—萬軍个元帥恁樣講：「在以東無辦法再尋到智慧係麼？佢等當中賢能个人無辦法再㧯佢等講愛樣般做係麼？佢等个智慧全部無掉去係麼？
8 底但人啊，愛轉身逃走！去尋所在囥起來！因為𠊎責罰以掃後代个日仔到了；𠊎愛消滅佢等！
9 人摘葡萄个時，會留兜葡萄在樹頂；暗晡頭賊仔入來，單淨偷佢等所愛个定定。
10 總係𠊎愛將以掃个後代剝到光光，露出佢等囥身个所在，使佢等無法度好囥。以東人並佢等个親族㧯鄰舍全部消滅了，無留一儕。
11 將你等个孤兒交給𠊎，𠊎會保護佢等；你等个寡婦也做得倚靠𠊎。」
12 上主恁樣講：「看啊，若係連該兜無應該受責罰个人全部愛啉責罰个杯，你等敢有可能毋使受責罰嗎？無可能！你等一定愛啉這個杯。
13 𠊎指自家發誓講，波斯拉城會變做荒地，成做害人著驚、被人侮辱、咒詛个所在。它附近所有个城市會永遠荒廢。𠊎—上主恁樣宣佈了。」
14 𠊎講：「以東啊，𠊎對上主該位得到一個消息。佢派使者到列國，喊佢等召集軍隊，準備攻擊你。
15 上主愛使你成做最弱个國家；無人會看重你。
16 你當驕傲，恅到自家盡威風；其實，你並無像自家所想恁受人敬畏。就算你住在山頂个崩崗，就算你像鷹鳥在盡高个所在做藪，上主也愛將你拉下來。上主恁樣宣佈了。」
17 上主講：「以東會受到得人畏个毀滅；逐個過路人看到定著會嚇倒，也會看毋起它。
18 頭擺所多瑪、蛾摩拉、㧯周圍个村莊樣般滅掉，以東也會恁樣被人滅掉，毋會再有人住。
19 看啊，就像獅仔對約旦河滣个樹林走出來，去到青翠个牧場；共樣，𠊎愛忽然間迫以東人逃走離開佢等个國家。然後𠊎所選立來做王个，就會統治這國家。麼人做得㧯𠊎比？麼人敢惹𠊎？㖠個統治者敢反對𠊎？
20 所以，你等愛聽𠊎—上主个計劃：𠊎愛㧯以東做對敵，對付提幔城个人。連佢等个細人仔全部會被人拉走，逐所在充滿大著驚。
21 以東橫落去个響聲會使全地緊顫，無葛無煞个噭聲會傳到紅海。
22 看啊，敵人就像鷹鳥打開翼胛，忽然衝下來攻擊波斯拉。該日，以東个勇士會像陣痛个產婦恁樣無葛無煞。」
23 有關大馬士革，上主講：「哈馬㧯亞珥拔城个人無平安，因為佢等聽到壞消息。佢等个憂愁像大海浪，害佢等無法度平靜。
24 大馬士革人失掉勇氣，轉身逃走。佢等像產婦陣痛，非常憂傷痛苦。
25 這座識帶給人歡喜快樂，盡有名聲个城，會完全荒掉了。
26 城肚个後生人會在街巷被人㓾死；所有个戰士全部共日斷氣、毋會出聲。
27 𠊎愛用火燒大馬士革个城牆，將便‧哈達王个城堡燒掉。𠊎—上主、萬軍个元帥恁樣宣佈了。」
28 有關被巴比倫王尼布甲尼撒打輸个基達族㧯夏瑣城周圍个部落，上主恁樣講：「䟘起來！去攻擊基達人，剿滅東方人！
29 搶佢等个帳篷㧯羊群，拿走帳篷个布簾㧯底背一切个用品。帶走佢等个駱駝，㧯佢等講：『四周圍盡得人驚！』
30 「夏瑣人啊，𠊎—上主警告你等，遽遽逃走！走到遠遠个所在，去囥起來！巴比倫王尼布甲尼撒已經計劃愛攻打你等，佢已經決定了。」
31 上主講：「䟘起來！去攻打該兜恅到自家當安全毋使愁个人民！佢等个城無城門，也無門閂，全無防備。
32 去搶佢等个駱駝㧯所有个牛群！𠊎愛將該兜修剪頭那毛來尊敬神明个人逐散到四方去；𠊎愛對四周圍帶災難給佢等。
33 夏瑣城會永遠荒廢，成做野狗个竇，無人住。𠊎—上主恁樣宣佈了。」
34 西底家做猶大王个初期，上主—萬軍个元帥㧯先知耶利米講起有關以攔个事。
35 佢講：「𠊎愛拗斷以攔最主要个勢力—弓箭。
36 𠊎愛使風對四面八方去攻擊以攔，將它个子民逐散到各地，各國全部會有它个難民去到。
37 𠊎愛使以攔人驚該兜想愛㓾佢等个敵人。𠊎—上主愛大發譴降災禍給以攔人，用戰爭徹底消滅佢等。
38 𠊎—上主愛除滅佢等个君王㧯官長，在以攔建立𠊎个寶座。
39 總係有一日，𠊎愛俾以攔人轉去，重整家園。𠊎—上主恁樣宣佈了。」