Jeremiah 50
1 有關巴比倫㧯巴比倫人个土地，上主對先知耶利米恁樣講：
2 愛向列國宣佈這個消息！愛擎起大旗！愛發出公告，公開傳報：巴比倫陷落了！姖个神明馬杜克驚到了！巴比倫个偶像受到羞辱；姖可惡个神像被人㧹碎了！
3 「有一個國家對北方來攻打巴比倫，使姖全地荒廢，無人住；人㧯野獸全部走淨淨。」
4 上主講：「到該時，以色列㧯猶大个人民會共下來，緊行緊噭來尋𠊎—佢等个上帝。
5 佢等會問愛樣般轉去錫安。佢等會照該方向來，㧯𠊎立永遠个約，永遠毋會毋記得。
6 「𠊎个子民像迷路个羊。佢等个牧人害佢等在山中迷失，對一個山頭流浪到另外一個山頭，尋毋到自家个羊寮。
7 所有堵到佢等个就將佢等食掉。佢等个敵人講：『𠊎等恁樣做並無毋著，因為佢等得罪上主。佢等个祖先信靠上主，佢等也應該對上主忠實。』
8 「以色列人啊，愛遽遽對巴比倫逃命！你等愛像山羊牯恁樣行在羊群面前，帶頭對巴比倫人个地方走出來！
9 𠊎愛發動北方个大國聯合起來，攻打巴比倫。佢等會擺陣進攻，將巴比倫打下來。佢等个箭像神箭手射个箭，支支射到目標。
10 巴比倫會被人搶淨淨；搶姖个攏總會搶到當滿足。𠊎—上主恁樣宣佈了。」
11 上主講：「巴比倫人啊，你等識搶𠊎个產業，搶到當歡喜，像在牧場踏榖个牛牸仔，又像緊嘶个馬；
12 總係該像阿姆生養你个大城會被人羞辱。巴比倫會變做最弱个國家，成做曠野、旱地、沙漠。
13 因為𠊎大發譴，無人有可能繼續住在巴比倫。姖會完全荒廢；逐個過路人全部會被姖所受个災難嚇倒，也會看毋起姖。
14 「弓箭手啊，愛擺陣進攻，包圍巴比倫！愛開弓，將箭對準巴比倫，毋好毋拌得你个箭，因為姖得罪𠊎—上主。
15 愛在巴比倫个四周圍大聲喊！巴比倫已經投降了，姖个守望塔落掉，姖个城牆被人拆掉了。因為𠊎愛報復巴比倫人，你等也愛向佢等報仇；佢等樣般對待別人，你等也愛照恁樣對待佢等。
16 毋好俾巴比倫人委種，也毋好俾佢等擎禾鐮收割。城肚所有个外國人為到愛閃侵犯个軍隊全部愛走轉本族、本地去了。」
17 上主講：「以色列人像被獅仔逐散个羊群。亞述王先食佢等个肉；最後巴比倫王尼布甲尼撒喫佢等个骨頭。
18 為到這緣故，𠊎—上主、萬軍个元帥、以色列个上帝愛責罰巴比倫王㧯佢个國家，像𠊎以前責罰亞述王一樣。
19 𠊎愛帶領以色列人轉到佢等个故鄉。佢等會有好食迦密山㧯巴珊个土產，享受以法蓮山區㧯基列地區出產个五榖。
20 到該時，在以色列尋毋到麼介罪孽；在猶大也查毋出麼介罪惡；因為𠊎所賸下來个子民，𠊎愛赦免佢等。𠊎—上主恁樣宣佈了。」
21 上主講：「你等愛去攻擊米拉大翁人㧯住在比割个人民，追佢等，將佢等剿滅。你等愛照𠊎个命令執行。𠊎—上主恁樣宣佈了。
22 巴比倫國內會聽到戰爭个聲，係大毀滅个聲。
23 巴比倫識像大鐵鎚征服全世界，總係這下這鐵鎚會被人斬斷打爛。列國因為看到姖个荒涼就盡著驚。
24 巴比倫啊，你㧯𠊎做對敵；你被𠊎捉到；你已經跌落𠊎為你設个羅網，總係你還毋知。
25 𠊎已經打開倉庫，搬出𠊎發譴个時用个武器；因為𠊎—至高个上主、萬軍个元帥愛對付巴比倫。
26 你等愛對四面來進攻！打開姖个榖倉，將戰利品堆起來，就像堆榖共樣！愛將一切滅淨淨，麼介都毋好留下來！
27 㓾死佢等个士兵！將佢等像牛牯牽到屠宰場全部消滅！巴比倫人慘了！佢等受責罰个日仔到了！」
28 (對巴比倫逃出來个難民轉到錫安以後，佢等有講起上主—𠊎等个上帝因為巴比倫人燒掉佢个聖殿樣般施行報復。)
29 「愛召集弓箭手進攻巴比倫；喊所有會射箭个全部來安營包圍這城，毋准一儕走掉。愛照姖應該受个報復姖；姖樣般對待別人，就照恁樣對待姖，因為姖驕傲悖逆𠊎—上主、以色列个聖者。
30 姖个後生人會在街巷被人㓾死；所有个戰士全部共日斷氣、毋會出聲。𠊎—上主恁樣宣佈了。
31 「巴比倫啊，你忒驕傲了！𠊎—至高个上主、萬軍个元帥愛㧯你做對敵！𠊎責罰你个日仔到了。
32 你這驕傲个國家會跌倒，無人扶你䟘起來。𠊎愛放火燒你个城市，連周圍个一切也會燒到淨淨。」
33 上主—萬軍个元帥講：「以色列㧯猶大人民全部被人欺負。捉佢等个人將佢等𢫮𢫮捉等，毋肯放佢等走。
34 總係佢等个救贖者大有能力；佢个名係上主—萬軍个元帥。佢愛徹底為佢等伸冤，使全地得到平安；總係，佢愛使巴比倫人民驚到全無平安。」
35 上主講：巴比倫會滅亡了！會有刀劍臨到巴比倫个人民、統治者㧯謀士！
36 會有刀劍臨到姖个假先知，使佢等變到像大戇番！會有刀劍臨到姖个戰士，使佢等驚到愊愊掣！
37 會有刀劍攻擊姖个馬隊㧯戰車，連外國請來个兵仔也會被人㓾死；佢等會變做像婦女恁軟弱！戰亂會毀滅姖个財寶，搶走姖所有个東西！
38 會有旱災降在姖个河壩，使河壩全部燥掉！巴比倫係偶像盡多个國家；偶像害人民發癲。
39 「所以，曠野个走獸、野狗㧯鴕鳥會在巴比倫出入；永遠毋會有人住，世世代代毋會再有人住在該位。
40 頭擺𠊎—上帝毀滅所多瑪、蛾摩拉、並周圍个村莊，巴比倫也會恁樣受到毀滅，毋會再有人在該位住。𠊎—上主恁樣宣佈了。」
41 看啊，有一個民族對北方來，係遠方一個強大个國家；也有盡多君王準備來相㓾。
42 佢等用弓箭㧯刀劍裝備自家；佢等當殘忍、無憐憫个心。佢等騎馬个聲，像海浪吼吼滾；佢等擺陣好勢愛攻打巴比倫。
43 巴比倫王聽到這風聲，雙手就軟掉；佢就像產婦陣痛，非常痛苦。
44 「看啊，就像獅仔對約旦河滣个樹林走出來，去到青翠个牧場；共樣，𠊎愛忽然間迫巴比倫人逃走離開佢等个國家。然後𠊎所選立來做王个，就會統治這國家。麼人做得㧯𠊎比？麼人敢惹𠊎？㖠個統治者敢反對𠊎？
45 所以，你等愛聽𠊎—上主个計劃：𠊎愛㧯巴比倫做對敵，對付巴比倫个人民，連佢等个細人仔也全部會被人拉走；逐所在會充滿大著驚。
46 巴比倫被人佔領个時會有大聲音，連地也緊顫，無葛無煞个噭聲會傳到其他个國家。」