Jeremiah 3
1 上主講：「若係男人㧯𡜵娘離婚，𡜵娘離開佢去㧯別人結婚，佢樣做得將𡜵娘再接轉來呢？佢恁樣做就會打垃圾𠊎个土地。以色列啊，雖然你㧯恁多情郎行姦淫，總係這下你還想愛轉來尋𠊎係麼！
2 你昂頭看該兜光光个山！敢能尋到一垤你毋識打垃圾个土地麼？你坐在路堘等情郎，就像阿拉伯人在曠野伏等愛搶劫一樣。你个淫亂㧯邪惡已經打垃圾土地；
3 所以甘霖停止，春雨毋落。你還係有一副妓女个樣像，完全毋知見笑。
4 「以色列啊，這下你反轉對𠊎講：『你係𠊎个阿爸，對𠊎後生个時你就痛惜𠊎。
5 你敢會對𠊎發譴到永久嗎？』這係你所講个話，總係你還一直盡命做壞事。」
6 約西亞做猶大王个時，上主對𠊎講：「你看到該無貞節个以色列所行个麼？姖上到逐座高山頂，在逐頭大樹下行姦淫。
7 𠊎恅到，姖做這一切以後，會轉到𠊎這位來；總係姖無轉來；姖無貞節个姊妹猶大也看到了。
8 𠊎離掉無貞節个以色列，給姖離婚證書，因為姖行姦淫；該無貞節个姊妹猶大看到，總係姖並毋驚，還係去行姦淫，
9 一些仔都無感覺見笑。姖打垃圾土地；姖拜石頭、樹仔，對𠊎無守貞節。
10 做這一切以後，以色列無貞節个姊妹猶大詐意轉來，毋係真心愛歸向𠊎。𠊎—上主恁樣宣佈了。」
11 上主又㧯𠊎講，以色列雖然無貞節，總係比無貞節个猶大有較好兜仔。
12 所以，上主命令𠊎到北方，去向以色列講：「對𠊎無忠心个以色列啊，轉到𠊎這位來！𠊎毋會對你變面，𠊎對你个痛惜無改變；𠊎毋會永久向你發譴。
13 你定著愛承認自家个罪過，承認你得罪上主—你个上帝，識照自家个意思走來走去，在逐頭大樹下拜外國个神明，違背𠊎个命令。𠊎—上主恁樣宣佈了。」
14 上主講：「對𠊎無忠心个子民啊，倒轉來！𠊎係你等个老公。𠊎愛對你等个逐隻城選出一儕，每宗族選出兩儕，帶轉錫安去。
15 𠊎愛賜給你等合𠊎心意个統治者，佢等會用聰明㧯智慧來統治你等。
16 到你等在這垤土地上生養眾多个時，人民毋會再提起𠊎—上主个約櫃，毋使再想到，也毋使再紀念。佢等已經無需要約櫃，也毋使另外製造。
17 到該時，佢等會稱耶路撒冷做『上主个寶座』；萬國萬民全部會聚集在該位敬拜𠊎。佢等毋會再硬頸照邪惡个心去行事。
18 該時，以色列會㧯猶大聯合；佢等會共下對北方轉到𠊎賜給你等祖先做產業个土地。」
19 上主講：以色列啊，𠊎樂意認你做孻仔，將全世界最好个土地—該盡肥个，賜給你做產業。𠊎恅到你定著會喊𠊎「阿爸」，永遠毋會再悖逆𠊎。
20 總係你對𠊎無忠心，像無貞節个𡜵娘跈人走。𠊎—上主恁樣宣佈了。
21 聽啊，光光个山頂有求喊聲，係以色列人噭吱哀求个聲音；因為佢等偏離正路，毋記得上主—佢等个上帝。
22 你等無忠心个人啊，倒轉來！𠊎—上主愛醫治你等，使你等毋會再悖逆。你等應講：「係哦！𠊎等愛轉到上主該位，因為佢係𠊎等个上帝。
23 𠊎等在大山㧯細山頂拜偶像，事實上無得到一些仔幫助。只有上主—𠊎等个上帝正能拯救以色列。
24 總係𠊎等從細拜巴力—該見笑个偶像，所以𠊎等个羊群、牛群、子女，就係𠊎等祖先自古以來勞碌建立个家業全部了淨淨。
25 𠊎等應該見笑到橫落去，用羞恥來遮身。𠊎等㧯𠊎等个祖先長透得罪上主—𠊎等个上帝；𠊎等一直毋聽從上主—𠊎等上帝个命令。」