Jeremiah 2
1 上主吩咐𠊎
2 去向耶路撒冷个人民恁樣講：𠊎記得，你後生時㧯𠊎樣般恩愛！新婚期間，你樣般惜𠊎！你跈等𠊎行過曠野，經過無耕種个所在。
3 以色列啊，你係𠊎神聖个子民，係屬𠊎个，係最先熟个果子；麼人吞食你，𠊎就定佢等有罪，降災禍給佢等。𠊎—上主恁樣宣佈了。
4 雅各个後代，以色列个逐支族啊，你等愛留心聽上主个話！
5 上主恁樣講：到底你等个祖先看到𠊎有麼介毋著，佢等樣會離開𠊎恁遠，去跈虛空个偶像，使自家成做虛虛假假个人呢？
6 佢等也毋問：「該救𠊎等離開埃及，𢱋𠊎等經過曠野，有深壢个沙漠，燥旱烏暗个荒地，無人住，無人行个所在，該上主在㖠位？」
7 𠊎將佢等帶到盡肥个土地去，俾佢等享受果子㧯豐盛个出產。總係佢等蹧踏𠊎个土地，打垃圾𠊎賜給佢等个產業。
8 祭司毋識問：「上主在㖠位？」教法律書个毋認識𠊎。領袖悖逆𠊎；先知奉巴力个名講預言，拜全無利益个偶像。
9 所以，𠊎—上主愛告自家个子民㧯佢等个後代。
10 你等到西片个塞浦路斯去看！你等派人到東片个基達去探查！看識發生恁樣个事麼？
11 雖然偶像毋係真神，敢有國家將它个神明換掉？𠊎係榮光个上帝，𠊎个子民反轉將𠊎換做無用个偶像。
12 上主講：諸天愛因為恁樣著驚，驚到愊愊掣！
13 因為𠊎个子民犯兩樣个罪：佢等離開𠊎—生命水个泉源；自家去挖水窟，係破裂無法囤水个水窟。
14 以色列敢係奴才？敢係奴才𫱔个？做麼介敵人愛來捉佢呢？
15 敵人像獅仔向佢吼吼滾，使佢个好田變做荒埔，將佢个城燒掉，變做無人住。
16 孟斐斯人㧯答比匿人將佢个頭那剃光光。
17 以色列啊，敢毋係你自家惹禍上身嗎！𠊎一路帶領你个時，你敢毋係離開𠊎—上主、你个上帝嗎？
18 這下你做麼介愛去埃及？想愛啉尼羅河个水係麼？做麼介愛去亞述？想愛啉幼發拉底河个水係麼？
19 你自家个罪惡會責罰你；你个悖逆會責備你。你愛知，愛明白：離開𠊎—上主、你个上帝，毋敬畏𠊎，係樣般艱苦个壞事！𠊎—至高个上主、萬軍个元帥恁樣宣佈了。
20 至高个上主講：以色列啊，你早就拗斷你个軛，解開你个索仔，毋肯事奉𠊎。你在逐座高山頂，逐頭大樹下，拜神明犯淫亂。
21 𠊎栽種你，像種特選个葡萄樹；𠊎全部係用最好个葡萄種。總係你樣般會變做最差个野葡萄呢？
22 就算你用最好个茶籸洗淨，𠊎還係看出你罪惡个污點。
23 你樣做得講你無污穢自家，無跈過巴力？看你留在山壢个腳跡，回想你做過麼介事！你就像亂猋个駱駝乸，
24 像情慾衝動个野驢，走醒个時無法度控制。公驢愛追牠全無困難；交配期間黏時就尋得到牠。
25 以色列啊，毋好跈別个神明，毋好跈到鞋爛掉，追到喉嗹燥！總係你講：「講乜無效了！𠊎中意到外國人个神明；𠊎愛跈到底！」
26 上主講：「賊仔被人捉到係樣般見笑；以色列人啊，你等㧯你等个君王、領袖、祭司、先知全部也會恁見笑。
27 你這兜認樹仔做阿爸，喊石頭做阿姆个，你等背向𠊎，毋係面向𠊎。總係你等堵到災難个時，又求𠊎來拯救！
28 「你等為自家造个神明在㖠位呢？若係它兜能救你等，堵到患難个時，俾它兜來救你等就好哪！猶大人啊，你等个神明㧯你等个城市平多。
29 你等全部悖逆𠊎！做麼介還㧯𠊎拗呢？
30 𠊎責罰你等全無效果，因為你等毋受教。像發狂个獅仔共樣，你等㓾自家个先知。
31 這世代个人啊，你等愛明白𠊎—上主个話！對以色列人來講，𠊎敢識像曠野？敢像烏暗陰險个所在嗎？做麼介𠊎个子民愛講：『𠊎等愛照自家个意思行，無愛轉你該位去啊』？
32 細妹仔會毋記得自家个珠寶麼？新娘敢會毋記得姖个禮服麼？總係𠊎个子民毋記得𠊎，已經算毋出有幾久！
33 你等當精通求愛个方法噢！連最壞个細妹仔也愛學你等。
34 你等个衫褲膏到窮人㧯無罪个人个血，總係佢等並無挖你个屋偷東西！「雖然恁樣，
35 你等還係講：『𠊎係無罪个；上主對𠊎个發譴已經無掉去了。』看啊，𠊎—上主一定愛責罰你等，因為你等毋承認自家个罪！
36 你等做麼介走來走去，四處去尋別个神明呢？埃及會俾你等失望，像亞述識俾你等失望共樣。
37 你等會雙手揇等頭那當見笑對埃及出來。因為𠊎—上主豁掉你等所倚靠个偶像；你等毋會對它兜得到麼介幫助。」