Jeremiah 4
1 上主恁樣講：「以色列人啊，若係你等肯回頭，就倒轉𠊎這位來！若係你等肯對𠊎面前除掉𠊎所惱个偶像，無三心兩意，
2 你等就會有好用誠實、公平、公義个態度指等𠊎—永生上主个名發誓。恁樣萬國全部會因為𠊎得到福氣，也會來榮耀𠊎。」
3 上主對猶大人㧯耶路撒冷人恁樣講：「你等愛開墾無犁過个土地，毋好在竻藪肚委種。
4 猶大㧯耶路撒冷个人民啊，你等个心靈愛受割禮，除掉心肚个垃圾，將自家獻給𠊎—你等个上主。若無，你等个壞行為會惹𠊎發火，無人能打烏。」
5 愛向全國歕羊角，發出警報，愛對猶大㧯耶路撒冷人大聲喊：集合起來，遽遽走入防衛城去！
6 愛將去錫安个路標頓起來！毋好緊拖，愛遽遽逃命！上主愛降大災禍；大毀滅會對北方臨到。
7 該毀滅萬國个已經對佢个本國出發，就像獅仔走出山林。佢會使猶大个土地荒掉，城鎮破壞到無人住。
8 所以，你等愛著麻衫，緊喊緊噭，因為上主對𠊎等个發譴還吂消。
9 上主講：「該時，君王㧯官長會失掉勇氣；祭司會大著驚；先知也會發咄愕。」
10 𠊎講：「嗐！至高个上主啊，你正經欺騙這兜人㧯耶路撒冷！你講會有平安，其實刀劍指等佢等个喉嗹。」
11 到該時，上主會對這兜人㧯耶路撒冷講：「有當燒个風對曠野光光个山頂向你等吹來，毋係為到簸榖，也毋係愛將冇仔吹淨，
12 係𠊎將該強烈个風吹過來！係𠊎自家愛審判𠊎个子民。」
13 看啊！敵人像烏雲揜過來；佢个戰車像龍捲風掃等來，佢个戰馬比鷹鳥較遽！𠊎等慘了！𠊎等無命了！
14 耶路撒冷啊，愛洗掉心中个罪惡，你就會得救。壞心術留在你个心肚愛到幾時呢？
15 聽啊，有使者對北片但支族个地區一直向南到以法蓮山區來報壞消息。
16 佢等向各國講，也提醒耶路撒冷：「有敵人對遠遠个所在來。佢等大聲嘶，來攻打猶大逐隻城市。
17 佢等會包圍耶路撒冷，像看守个人監視田園。」這係因為猶大个人民悖逆𠊎。𠊎—上主恁樣宣佈了。
18 猶大啊，你个所行所做給你自家惹來恁大个災禍。你个罪害你受苦，刺穿你个心！
19 𠊎个心啊！𠊎个心啊！𠊎樣會恁艱苦？𠊎个心肝煩躁，無辦法恬恬毋講話，因為𠊎聽到羊角个響聲㧯相㓾个聲。
20 災難不斷；全國荒廢。𠊎个帳篷忽然間橫掉，帳篷个布簾一下仔就裂掉。
21 𠊎看到軍旗，聽到羊角个聲，愛到幾時呢？
22 上主講：「𠊎个子民戇檔；佢等毋認識𠊎。佢等像無知个細人仔，無半些智慧。佢等當會做壞事，毋知樣般做好事。」
23 𠊎看地，地係空空無成形；𠊎看天，天也無光。
24 𠊎看山，大山緊顫，細山也搖來搖去。
25 𠊎看毋到人影；連天頂个鳥仔也全部飛走。
26 𠊎看到好田變荒地；城市全部橫到像土堆，因為上主大發譴。
27 上主恁樣講：「全地一定會荒涼，總係𠊎毋會徹底毀滅。
28 地會悲傷，天會變烏。𠊎已經講了，已經定著了，絕對毋會後悔，也毋會改變。」
29 先知講：逐城市个人一聽到騎兵㧯箭手个聲，全部盡命逃難。有兜走入樹林；有兜爬到石縫肚囥。人走淨淨，城市空空！
30 耶路撒冷啊，你壞掉了！你樣愛使著高貴个紅衫？樣愛使戴珠寶金器？樣愛使膏粉畫眉呢？你打扮恁靚有麼介用呢？你个情郎藐視你，還想愛收你个命呢！
31 𠊎聽到像生產个婦人家陣痛个喊聲，像𫱔頭胎恁樣盡嘶。原來係錫安个噭聲；姖緊透大氣、伸開雙手，講：「唉！𠊎今就慘了！佢等愛來㓾𠊎！𠊎驚到強強會昏掉了。」