Bible

1 上主講：「你愛大聲嘶，像羊角恁響、毋好停。愛向𠊎个子民以色列宣佈佢等个悖逆㧯罪過。 2 佢等日日求𠊎，當像愛知𠊎个道路；佢等个國家也當像有行正義，服從𠊎个法律。佢等求𠊎給佢等公正个法律，表示佢等歡喜親近𠊎。」 3 以色列人問：「做麼介𠊎等禁食，你無愛看？做麼介𠊎等刻苦修行，你也無愛插？」上主對佢等講：「看啊！你等禁食个日仔，還係追求享樂，還係欺負工人。 4 你等个禁食使你等還較惡，挺動到就相吵相打。你等个禁食係恁樣，你等還恅到𠊎會聽你等个祈禱嗎？ 5 你等禁食个時，蹧踏自家个膚身，看起來就像頭攋攋會燥掉个花草。你等在地上鋪麻布，委火灰，然後睡在頂高。這敢係禁食？你等恅到𠊎會歡喜恁樣个禁食係麼？ 6 「𠊎所歡喜个禁食係：解開欺負人个鎖鍊㧯無公當个軛；釋放受欺負个人，拗斷一切个軛。 7 愛將你等个食物分給肚飢个人；將你等个屋開放給無屋好住个窮苦人；拿衫褲給無好著个人；親人求你幫助，毋好拒絕。 8 「恁樣，𠊎就會歡喜你等，像朝晨頭个日頭照你等；你等个傷口就會黏時得到醫治。𠊎會行在你等个頭前主持公義，𠊎个榮光愛在後背保護你等。 9 你等祈禱，𠊎一定會聽；你等求幫助，𠊎一定答應。「若係你等無再欺負人，責備人，糮糝講人个壞話， 10 若係你等拿給肚飢个人食，使窮苦人得到滿足，你等个光會使周圍个烏暗變做光明，暗晡頭會變做當晝頭。 11 𠊎—上主會繼續帶領你等，賜好東西使你心滿意足，使你等个骨頭強壯有力；就係在燥旱个地，你等也會像水源充足个果園，有永遠毋會燥掉个泉水。 12 你等會在荒埔頂重建，將毀壞盡久个根基重新起起來。後代會紀念你等係修補城牆爛孔个人，你等又將橫掉个屋仔重新整給人住。」 13 上主講：「若係你等守安息日做聖日，無在該日做自家歡喜个事；若係你等歡喜又尊重𠊎个聖日，無在該日旅行、工作、講閒話， 14 你等就會對𠊎得到喜樂。𠊎愛使你等在世上受人尊重，你等會在𠊎賜給你等祖先雅各个土地上享受福樂。𠊎—上主恁樣宣佈了。」