Isaiah 59
1 毋好恅到上主个手忒短、無辦法救你等，抑係耳聾聽毋到你等个求喊！
2 佢揞面毋聽，係因為你等个罪；你等个罪害你等㧯上帝隔絕，使你等个敬拜變無效。
3 你等雙手膏到血，手指被罪打垃圾；你等个嘴唇講花撩，舌乸講兇惡个話。
4 你等上法院，總係無照公道行，也無講誠實話。你等靠講花撩打官司；你等心肝惡毒、行事積惡。
5 你等就像毒蛇孵卵，像𬠏䗁經網。人食到這卵就無命；卵打爛掉，毒蛇就趖出來。
6 你等个陰謀遮毋掉自家个污穢，像𬠏䗁網無辦法準衫褲著；你等个行為當壞，手段殘暴。
7 你等時時計劃做壞事，遽遽去流無辜人个血。你等个思想全部係罪惡；你等所經過个地方定著受到破壞㧯毀滅。
8 你等去到麼介所在，該所在就無平安。你等所做个全部盡無公平；你等造彎彎斡斡个路、充滿邪惡；行這條路个人全部無安全。
9 以色列人講：「這下𠊎等正知做麼介公義離𠊎等恁遠，公平毋跈等𠊎等。𠊎等尋求光明，總係只有烏暗；希望得到亮光，顛倒行在烏暗中。
10 𠊎等像瞙目个摸等壁行，在日時頭像在暗晡時共樣；𠊎等看起來像盡紮磳个人，事實上㧯死人差毋多。
11 𠊎等像熊仔恁樣緊吼，像月鴿仔恁樣緊噭；盡想愛有公平，總係得毋到；希望得到救恩，總係救恩離𠊎等盡遠。
12 「上主啊，在你面前，𠊎等有盡多个過犯；𠊎等个罪在控告𠊎等；𠊎等知自家積當多罪惡。
13 𠊎等反抗你，悖逆你，毋跈𠊎等个上帝。𠊎等欺負別人，反對你。𠊎等个心肝詭詐，所講个全部係花撩。
14 公平受迫退走，正義企到遠遠；真理在街項企毋住，誠實無法度進入𠊎等當中。
15 尋毋到真理；毋做壞事个人反轉被人欺負。」上主看到這一切个事；佢看到公平毋見掉就無歡喜。
16 佢感覺盡奇怪，被人欺負个樣會無人幫助。所以，佢愛用自家大能个手拯救佢等，用正義扶持佢等。
17 佢愛著公義个戰甲，戴救恩个鐵帽仔。佢愛著報仇个衫褲，用熱心做長袍。
18 佢愛照逐儕个行為報應佢等，用大發譴來報復敵人；住在海島个人也會受到報應。
19 對日出到日落个所在，佢等全部會敬畏上主个名㧯佢个榮耀；因為上主會像狂風大水恁樣來到。
20 上主對佢个子民講：「𠊎愛來救贖錫安，拯救以色列離開罪惡个人。
21 這係𠊎親自㧯你等立个約：𠊎个靈㧯你等共下；𠊎傳給你等个話也定著毋會離開你等个嘴，也毋會離開你等子子孫孫个嘴，從今直到永遠。」