Isaiah 57
1 上主講：好人死掉，無人放在心上；虔誠人過身，也無人了解，佢等死掉，反轉係脫離災禍。
2 行為正直个人過身該時，安然睡在自家个眠床，事實上佢等係進入平安个所在。
3 總係，你這兜人就像係仙姑个孻仔，姦夫、妓女个子孫。行近來接受審判！
4 你等愛嘲謔麼人？你等變鬼變怪愛㩢耍麼人？你等敢毋係悖逆人个後代，落仔个子孫？
5 你等在橡樹中間，在逐頭大樹下行姦淫，拜繁殖个神明！你等在山壢中个石窿肚將自家个細人仔㓾來獻祭。
6 你等拜山壢中光滑个石頭，獻酒做祭酒，又獻素祭。這兜事愛喊𠊎樣般忍受？
7 你等上到高山頂行姦淫，又在該位獻祭。
8 你等在自家屋肚个大門㧯門框後背安外邦邪淫个記號。你等就像背等𠊎、脫光衫褲，上大眠床，㧯花錢召來个情人睡目。你等貪戀佢等个眠床，來滿足自家个慾望。
9 你等還帶香油去拜摩洛神，又獻盡多香料，也派使者到遠遠个所在去，甚至到陰間去尋神明。
10 因為路途當遠，你等感覺當𤸁當痶，還係毋死心。你等恅到尋這兜邪神會給你等得到氣力，你等就毋會恁痶。
11 你等驚麼人？你等因為驚神明卻來對𠊎講花撩，毋記得𠊎，也無將𠊎放在心上。係毋係因為𠊎對你等恬恬恁久，你等就毋驚𠊎？
12 你等卻恅到自家做當著。𠊎愛指出你等所做个罪惡，你等拜偶像對自家無半些幫助。
13 你等求幫助个時，看該兜收來个偶像會來救你等麼！其實，一陣風就會將它兜吹走，一口氣就會將它兜歕走！總係該兜信靠𠊎个人會承接這垤土地；佢等會得到𠊎个聖山做產業。
14 上主講：「地愛坉高、路愛整好勢，為𠊎个子民清除杈路个東西！
15 「𠊎係至高無上、永遠存在、神聖个上帝。𠊎住在至高神聖个所在，也住在真心悔改㧯謙卑个人當中。𠊎使謙卑个人恢復信心，使真心悔改个人重新得到希望。
16 𠊎毋會永遠責備，也毋會永遠發譴；因為𠊎若恁樣做，𠊎造个子民一定會在𠊎面前滅掉。
17 𠊎向佢等發譴，因為佢等貪心犯罪；所以𠊎揞等面責罰佢等。佢等還係硬頸，繼續行自家个路。
18 「𠊎有看到佢等个行為，總係𠊎還係愛醫治佢等。𠊎愛帶領佢等，俾佢等重新得到安慰；該傷心个人嘴唇會發出讚美。」
19 上主講：「平安！平安！無論遠近个人，𠊎愛賜佢等平安；𠊎愛醫治佢等。
20 總係壞人像無平靜个海面，有得人驚个大海浪；佢等个人生湧出垃圾㧯屙糟个東西。」
21 𠊎个上帝講：「作惡个人毋會有平安！」