Bible

1 沙漠㧯旱地會歡喜快樂；曠野開滿玫瑰花。 2 沙漠花花綠綠、萬紫千紅，大聲歡喜唱歌。它會像黎巴嫩个榮光，像迦密㧯沙崙恁靚。逐個人會看到上主个榮光，看到𠊎等上帝个威嚴。 3 你等愛使軟弱个手勇健，使無力个膝頭堅強起來。 4 愛㧯無膽个人講：「愛堅強，毋使驚！上帝愛來拯救你等；佢愛為你等報仇。」 5 該時，瞙目个會看得到，耳聾个會聽得到， 6 跛腳个會像鹿仔跳舞，啞口會大聲唱歌。曠野會湧出泉水；沙漠會有河壩。 7 會熝人个沙埔會變成陂塘；旱地會有水源。野狗睡个所在，會生出青草、蘆竹㧯蒲草。 8 會有一條大路，愛稱做「聖潔个路」。無淨浰个人做毋得行這條路，愛專門俾上帝个子民行；路項个旅客，甚至戇檔人，也毋會行差路。 9 該所在無獅仔，也無野獸。只有上主拯救个人，在這條大路項行。 10 上主救贖个人一定會轉來；佢等會快樂大聲唱歌，歡歡喜喜來到錫安。佢等會永遠歡喜快樂，毋會再憂愁歎息。