Isaiah 36
1 希西家王在位第十四年，亞述皇帝西拿基立攻打猶大所有个防衛城，將它兜佔領。
2 然後亞述皇帝命令佢个大將帶一大隊个兵仔對拉吉去耶路撒冷，愛希西家王投降。佢等擺陣在上池水溝滣，在通到染布工廠个大路項。
3 三個猶大代表出來談判；佢等係希勒家个孻仔王宮總管以利亞敬，王室書記舍伯那，㧯亞薩个孻仔歷史官約亞。
4 亞述个大將對佢等講：「你等去㧯希西家講，亞述大皇帝恁樣講：『你憑麼介恁有把扼？
5 你恅到賣嘴花就有相㓾个計謀㧯能力係麼？你靠麼人想愛反𠊎？
6 你毋使想埃及會來幫助你，該就像拄等一支玭掉个蘆竹準做柺棍仔行路；它會刺穿人个手。埃及王對付所有投靠佢个人就係恁樣。
7 可能你等會對𠊎講：𠊎等倚靠上主—𠊎等个上帝。總係，希西家敢毋係廢掉佢山頂个廟㧯祭壇？佢敢毋係吩咐猶大㧯耶路撒冷个人民，單淨做得在一個祭壇前敬拜上主嗎？』
8 這下𠊎用吾主亞述皇帝个名義㧯你賭：若係你能尋出兩千騎兵，𠊎就送你兩千隻戰馬！
9 其實，你連亞述軍隊中最細个軍官也打毋贏，你還妄想愛靠埃及个戰車騎兵！
10 這下𠊎來攻打毀滅你个國家，敢毋係上主个意思？上主親自吩咐𠊎來攻打毀滅這個國家。」
11 然後，以利亞敬、舍伯那、㧯約亞對該大將講：「先生，請用亞蘭話㧯僕人講話；𠊎等聽得識。毋好用希伯來話講，因為城樓頂个人民全部在該位聽。」
12 大將講：「你等恅到皇帝喊𠊎單單對你等㧯王講這兜話麼？𠊎也敢毋係對該兜坐在城樓頂个人民講，佢等㧯你等共樣，全部會食自家个屎，啉自家个尿？」
13 所以，大將企出來，用希伯來話大聲喊講：「你等愛聽亞述大皇帝个話！
14 皇帝警告你等：毋好被希西家欺騙；希西家無辦法救你等。
15 希西家雖然一直講：『上主一定會拯救𠊎等，這個城毋會交在亞述皇帝个手中』，總係你等毋好被佢騙去倚靠上主。
16 毋好聽希西家个話！亞述皇帝命令你等出來講和投降。恁樣，你等還係做得食自家个葡萄、自家个無花果，啉自家井肚个水。
17 直到皇帝將你等徙到另外一個地方，㧯你等這地方共樣，有五榖、葡萄，有餅、美酒。
18 你等毋好被希西家騙去，恅到上主會來拯救你等。你等看過有㖠隻國家个神明拯救自家个國家脫離亞述皇帝个手？
19 哈馬㧯亞珥拔个神明這下在㖠位？西法瓦音个神明又在㖠位？佢等敢有來救撒馬利亞脫離𠊎个手？
20 有㖠兜神明識對𠊎个手拯救佢等个國家？上主敢會救耶路撒冷脫離𠊎个手？」
21 人民全部恬恬，無應半句話；因為希西家王識下令，講：「毋好應佢！」
22 該時，希勒家个孻仔王宮總管以利亞敬、王室書記舍伯那、㧯亞薩个孻仔歷史官約亞悲傷到扯爛衫，轉去將亞述大將个話向希西家王報告。