Bible

1 列國个人民啊，全部來啊！你等全部來聽。全世界个人愛到𠊎面前來聽。 2 上主對各國㧯佢等个軍隊大發譴，將佢等交給人㓾，徹底消滅佢等。 3 佢等个身屍被人亂㧒，糜到臭味衝天；滿山係血。 4 天上个萬象全部會消散掉。天會像捲起來个書卷；星仔跌下來，像無花果㧯葡萄樹个葉仔跌下來一樣。 5 上主在天頂个寶劍已經準備好勢；這下佢愛㓾掉佢早就決定愛滅亡个以東人。 6 上主个劍愛膏滿佢等个血㧯油，像獻祭用个細羊㧯山羊个血，並綿羊牯腰仔个油。上主愛在波斯拉城獻祭，在以東進行大屠殺。 7 人民會像野牛㧯細牛牯共樣死在地上；佢等个土地逐位係血，滿遍油濟濟。 8 這係上主為到拯救錫安、來向仇敵報仇个日仔。 9 以東个河壩會變做馬膠，泥變做硫磺；土地像燒𤏸个馬膠， 10 日夜𤏸火，濃煙衝天。這垤土地會世世代代荒廢，永遠無人經過。 11 該所在只有鵜鶘、箭豬、貓頭鳥、㧯烏鴉還住在該位。上主愛使它空虛到毋成形，像世界創造以前共樣。 12 無王，也無長官治理這垤土地。 13 王宮㧯城牆全部生滿竻仔、蒺藜，只有野狗㧯鴕鳥住在該位。 14 豺狼、野山羊、㧯其他野獸在該位趖來趖去，發出怪聲招伴；也有暗晡頭个妖怪出來尋歇睏个地方。 15 貓頭鳥在該位做藪、生卵、孵子。鷹鳥雙雙對對飛來，聚集在該位。 16 你等去研究上主个書，看書底背樣般寫。這兜動物全部無漏掉，牠兜愛在該位做伴配對。這係上主親自吩咐个；主个靈愛將牠兜聚集共下。 17 主用拈鬮㧯量尺分配這垤土地給牠兜；牠兜會世世代代住在該位。這地會永遠屬牠兜。