1所以，大流士皇帝命令調查保存在巴比倫个皇室記錄。
2總係佢等在米底亞省个亞馬他城个宮內發現一卷古卷，頂高有恁樣个記載：
3「塞魯士做皇帝个第一年，下令重建耶路撒冷上帝个聖殿，做獻祭个所在。這殿愛有二十七公尺高，二十七公尺闊。
4壁愛用三層大石頭隔一層樹料个方式來起。所有費用對國庫支出。
5尼布甲尼撒王對耶路撒冷聖殿帶到巴比倫來个金器、銀器，也愛歸還耶路撒冷个聖殿，放在上帝聖殿肚原來个位所。」
6所以，大流士皇帝回信講：「河西省省長達乃、示他‧波斯乃㧯河西省个眾官員：「你等愛離開該聖殿；
7毋好干涉建殿个工程。愛俾猶大省長㧯猶太人个領袖在原來个地方重建上帝个聖殿。
8𠊎這下命令你等愛幫助佢等重建。所需要个全部費用遽遽對王庫㧯河西省稅收个部份撥出，免得工程停下來。
9你等愛日日供應耶路撒冷祭司个需要；無論係用來做燒化祭獻給天頂上帝个細牛牯、綿羊牯、細綿羊，抑係麥仔、鹽、酒㧯橄欖油，你等全部愛供給。
10恁樣，佢等就有好獻天頂上帝所歡喜个清香牲儀，並祈求佢賜福給𠊎㧯𠊎个子孫。
11𠊎另外下令：若係有人隨便改𠊎个命令，愛將厥屋頂个樑挷出一枝，刺穿佢，將佢掛在頂高，佢个屋仔也愛成做垃圾堆。
12若係有君王抑係人民改這個命令，想愛毀壞這聖殿，願該揀選耶路撒冷做敬拜佢个地方个上帝消滅佢。這係𠊎—大流士个命令，定著愛徹底遵行。」
13所以，河西省長達乃、示他‧波斯乃並佢等个共黨，徹底遵行大流士皇帝个命令。
14猶太人該兜長老得到先知哈該㧯易多个孫仔撒迦利亞个鼓勵，建殿个工作進行當順利。佢等照以色列上帝个旨意，㧯波斯皇帝塞魯士、大流士、還有亞達薛西个命令完成起聖殿个工程。
15聖殿完工係在大流士做皇帝个第六年，亞達月初三。
16以色列个人民，包含祭司、利未人㧯所有對流亡轉來个人，全部歡歡喜喜來舉行奉獻上帝聖殿个典禮。
17為奉獻這聖殿个典禮，佢等獻一百隻牛牯，兩百隻綿羊牯，㧯四百隻細綿羊做牲儀，又照以色列支族个數目獻十二隻山羊牯做贖罪祭。
18佢等照摩西个書所指示个，將祭司㧯利未人組織起來，照排班在耶路撒冷聖殿肚服事上帝。
19第二年正月十四，對流亡轉來个人民守𨃟過節。
20所有个祭司㧯利未人全部照儀式潔淨自家。利未人為所有轉來个人民、祭司兄弟㧯自家㓾𨃟過節个羊仔。
21所有對流亡轉來个以色列人全部有食這羊仔；該兜住在這地、離開異教轉來拜上主—以色列上帝个人也食這羊仔。
22佢等歡歡喜喜慶祝除酵節七日久。佢等充滿快樂；因為上主使亞述皇帝對佢等當好，幫助佢等重建以色列上帝个聖殿。