Ezra 7
1 盡多年後，當亞達薛西做波斯皇帝个時，以斯拉對巴比倫轉來。以斯拉个祖先係大祭司亞倫；佢个族譜記在下背：以斯拉係西萊雅个孻仔，西萊雅係亞撒利雅个孻仔，亞撒利雅係希勒家个孻仔，
2 希勒家係沙龍个孻仔，沙龍係撒督个孻仔，撒督係亞希突个孻仔，
3 亞希突係亞瑪利雅个孻仔，亞瑪利雅係亞撒利雅个孻仔，亞撒利雅係米拉約个孻仔，
4 米拉約係西拉希雅个孻仔，西拉希雅係烏西个孻仔，烏西係布基个孻仔，
5 布基係亞比書个孻仔，亞比書係非尼哈个孻仔，非尼哈係以利亞撒个孻仔，以利亞撒係亞倫个孻仔。
6 以斯拉係盡有學問个經學專家，精通上主—以色列上帝給摩西个法律。因為上主—佢个上帝賜福給佢，以斯拉要求皇帝个逐件事，皇帝全部准佢。
7 亞達薛西在位个第七年，以斯拉㧯一群以色列人對巴比倫起身轉耶路撒冷。這群人包含祭司、利未人、聖殿歌手、聖殿守衛㧯工人。
10 以斯拉一生專心研究並遵行上主个教示，又將所有法律條例教導以色列人民。
11 以斯拉係祭司㧯經學專家，精通上主賜給以色列个誡命㧯法律。亞達薛西皇帝將以下个信仔送給以斯拉。
12 「𠊎—亞達薛西，眾王个王，寫信仔給精通天頂上帝法律个經學專家以斯拉祭司：
13 「𠊎命令帝國內以色列个人民、祭司㧯利未人，願意个人全部做得㧯你共下轉耶路撒冷去。
14 𠊎，連同𠊎七個參謀，派你去調查耶路撒冷㧯猶大个情形，看人民有遵守上帝交給你个法律書麼。
15 你愛帶𠊎㧯𠊎个參謀甘心獻个金銀、祭物給該位住在耶路撒冷聖殿个以色列上帝。
16 你也愛帶等你在巴比倫省徵收所有个金銀，並以色列人㧯該兜祭司甘心獻給耶路撒冷上帝聖殿个禮物。
17 「你愛留心用這兜錢買牛牯、綿羊牯、細綿羊、五榖㧯酒，獻在耶路撒冷—你等上帝聖殿个祭壇頂。
18 賸到个金銀，你做得照你等上帝个旨意，用在你㧯同胞認為妥當个所在。
19 你愛將所有交給你該兜在聖殿事奉个用品獻給耶路撒冷个上帝。
20 另外，上帝聖殿所需要个其他東西，你全部做得對國庫取用。
21 「𠊎—亞達薛西皇帝命令所有在河西省个財政官員，愛遽遽供給這個精通天頂上帝法律个專家—以斯拉祭司所要求个逐樣東西；
22 莫超過：銀仔三千四百公斤，麥仔一萬公斤，酒兩千公升，橄欖油兩千公升；鹽就無限制。
23 你等愛謹慎，天頂上帝為佢聖殿所命令个逐樣東西，你等全部愛供給；恁樣，佢正毋會向𠊎㧯承接𠊎王位个人發譴。
24 你等做毋得向祭司、利未人、歌手、守衛、工人，抑係所有㧯這聖殿有關个人打稅。
25 「以斯拉，你愛用上帝給你个智慧，指派行政官員㧯審判官去治理全河西省个人民，就係該兜遵守你上帝法律个人民。你一定愛將該法律教無明白个人。
26 若係有人毋服從你上帝个法律抑係這帝國个法律，佢一定愛黏時受到嚴嚴个處罰：處死刑、充軍、沒收財產，抑係坐監。」
27 以斯拉講：「願上主—𠊎等祖先个上帝得到讚美！佢使皇帝甘願用這方法來加添耶路撒冷上主聖殿个尊榮。
28 上帝个恩典使𠊎得到皇帝、佢該兜參謀，㧯佢一切有權勢官員个幫助。上主—𠊎个上帝給𠊎勇氣，使𠊎喊盡多以色列宗族个領袖，願意㧯𠊎共下轉去。」