Ezra 5
1 該時，有兩個先知—哈該㧯易多个孫仔撒迦利亞—奉以色列上帝个名向住在猶大㧯耶路撒冷个猶太人講勉勵个話。
2 撒拉鐵个孻仔所羅巴伯㧯約撒達个孻仔耶書亞就開始重建在耶路撒冷上帝个聖殿，上帝兩位先知幫助佢等。
3 差毋多在同時，河西省省長達乃、示他‧波斯乃㧯佢等个共黨趕到耶路撒冷，責備佢等講：「麼人下令你等重建這殿，完成這工程呢？」
4 佢等又討到所有起殿負責人个名單。
5 總係上帝看顧猶太人該兜長老；波斯該兜官長決定等到佢等向大流士皇帝送上狀仔、得到回信後正採取行動。
6 以下係河西省省長達乃、示他‧波斯乃㧯佢等个共黨送給大流士皇帝个狀仔个副本：
7 「願大流士皇帝凡事平安！
8 「𠊎等應該報告皇帝，𠊎等去猶大省，看到至大上帝个聖殿用大石頭來起，並有大樑插入牆內。這項工程佢等做到當煞猛，進行當遽。
9 「𠊎等喊人民該兜長老㧯𠊎等講，麼人下令佢等重建這殿並完成這工程。
10 𠊎等也討到佢等个名單，恁樣𠊎等就能報告皇帝，麼人係這工程个領導人。
11 「佢等應講：『𠊎等係天地个主上帝个僕人。𠊎等這下重新修建个聖殿係當多年前以色列一位大能个王所建造㧯完成个。
12 因為𠊎等个祖先惹天頂个上帝發譴，上帝將佢等交在迦勒底人巴比倫皇帝尼布甲尼撒个手下，佢就拆掉這殿，又將人民捉到巴比倫去。
13 後來，在塞魯士王做巴比倫皇帝个第一年，塞魯士下命令重建這聖殿，
14 又歸還以前尼布甲尼撒對耶路撒冷聖殿搶去个該兜放在巴比倫神廟肚个金銀用品。塞魯士皇帝將這兜用品交給一個名安到設巴薩个人；佢係塞魯士皇帝指派做猶大省長个。
15 皇帝吩咐佢將這兜用品帶轉耶路撒冷个聖殿，又在聖殿舊个地點重新起上帝个聖殿。
16 所以，設巴薩轉來，在耶路撒冷打好上帝聖殿个地基；工程對該時到這下一直進行，還吂完工。』
17 「這下，皇帝若認為妥當，請派人調查巴比倫个皇室記錄，看塞魯士皇帝係毋係識下令重建耶路撒冷上帝个聖殿，然後請回信指示𠊎等，皇帝對這件事愛樣般做。」