Ezekiel 17
1 上主㧯𠊎講話；
2 佢講：「人子啊，你愛對以色列人做一個鈴仔、講一個比喻，
3 俾佢等明白𠊎—至高个上主愛向佢等講个話：有一隻大鷹鳥，翼胛當大、尾盡長、毛當靚。牠打開翼胛，飛到黎巴嫩山頂，啄斷香柏樹幼嫩个樹尾，
4 將它帶到商業中心，生理發達个城市。
5 然後，牠將以色列出產个一頭樹苗徙到一垤盡肥个土地，該位有罅額个水使它生長。
6 這頭樹抽筍生長，變成一頭矮矮、枝葉茂盛个葡萄樹。它个枝仔伸向該隻鷹鳥，樹根在牠个底下，成做枝葉靚靚个葡萄樹。
7 「另外有一隻大鷹鳥，也有一對當大个翼胛，毛當靚。這頭葡萄樹將根㧯枝仔全部伸向這隻鷹鳥，想對牠得到比果園還較豐富个水源。
8 其實，這頭葡萄樹早已經種在盡肥又多水个園肚，有罅額个條件使它生枝、結果，成做品種盡好个葡萄樹。
9 「所以，𠊎—至高个上主問：這頭葡萄樹會大到當茂盛麼？敢講第一隻鷹鳥毋會將它連根挷起來，摘淨葡萄，打斷枝仔，使它燥掉麼？毋使強大个國家也有辦法隨意將它連根挷掉。
10 無毋著，它斷真被人換來這位種，總係會大、會靚起來麼？它堪得起東風个吹打麼？敢毋會在該園肚燥掉麼？」
11 上主㧯𠊎講：
12 「你問該兜悖逆个人，看佢等了解這比喻个意思麼？㧯佢等講，巴比倫王到耶路撒冷將佢等个王㧯佢个官員捉到巴比倫去，
13 對王族中選出一儕來㧯佢立約，喊佢發誓愛忠心。巴比倫王又捉兜貴族來做人質，
14 來防止這國家復興，使姖確實遵守條約。
15 總係猶大王悖逆。佢派使者到埃及要求派戰馬㧯大軍前來幫助。佢有可能成功麼？佢走得掉麼？佢廢約敢有可能毋使受刑罰麼？」
16 至高个上主恁樣講：「𠊎指等𠊎永遠个生命發誓：這個王一定愛死在巴比倫。因為巴比倫王立佢做王，總係佢背誓，廢掉㧯巴比倫王所結个約。
17 巴比倫王來攻城，起土堆，造高臺，進行屠殺个時，就算埃及王派最精良个軍隊來乜無法度救佢。
18 佢背誓廢約。佢做這一切个事，這下走毋掉了。」
19 所以，至高个上主恁樣講：「𠊎指等𠊎永遠个生命發誓：𠊎愛責罰佢；因為佢看輕自家指等𠊎个名所發个誓，破壞指等𠊎个名所結个約。
20 𠊎愛打開羅網捉佢，帶佢到巴比倫去，在該位責罰佢，因為佢對𠊎無忠心。
21 佢最精良个戰士全部愛戰死；打輸个兵仔愛四處逃走。該時你等就會知𠊎—上主恁樣宣佈了。」
22 至高个上主恁樣講：𠊎愛拗斷香柏樹个樹尾，拗斷它个嫩枝；𠊎愛將它種在高山頂，
23 在以色列最高个山頂。它會大起來、結果子，成做一頭當靚个香柏樹。各種鳥仔飛來做藪，在樹影下尋到安身个所在。
24 田野所有个樹仔全部會知：𠊎—上主斬斷大樹，使細樹仔大起來；𠊎使青翠个樹枯燥，使枯燥个樹茂盛。𠊎—上主恁樣宣佈了。𠊎講過个，𠊎一定會實行。