Ezekiel 18
1 上主㧯𠊎講話；
2 佢講：「以色列國內流傳个這句俗語係麼介意思？你等講：爺𡟓食酸葡萄，卻酸到子女个牙齒。」
3 至高个上主恁樣講：「𠊎指等𠊎永遠个生命發誓：以色列國內絕對毋會再流傳這句俗語。
4 逐儕个生命全部係𠊎个；無論係爺𡟓抑係子女个生命全部屬𠊎。麼人犯罪，麼人就愛死。
5 「若係有一個誠實、公正个好人，
6 佢毋拜以色列人个偶像，毋去山頂个神廟食祭物，毋拐別人个𡜵娘，毋㧯經期中个婦女同房，
7 毋欺負人，毋搶別人个東西。佢將抵押个東西還給人，拿東西給肚飢个人食，拿衫褲給無衫好著个人著。
8 佢借錢給人毋拿利息，借東西毋會討加兜轉去，毋做壞事，處理糾紛當公當。
9 這種人服從𠊎个誡命，認真遵行𠊎个法律。佢就係義人；佢一定會有命。」至高个上主恁樣宣佈了。
12 佢欺負窮苦人、搶人个東西，毋將抵押个東西還人。佢拜偶像，做可惡个事，
13 借錢給人愛拿利息，借東西給人愛討加兜轉去。這種人敢做得俾佢生？佢絕對會死！佢做這一切恁壞个事，一定愛死；佢个死係自家做來个。
14 「若係這個人有一個孻仔，佢看到阿爸所有个罪惡，總係毋跈阿爸个壞模樣。
15 佢毋拜以色列人个偶像，毋去山頂神廟食祭物。佢毋拐別人个𡜵娘，
16 毋欺負人，毋搶別人个東西。佢將抵押个東西還給人，拿東西給肚飢个人食，拿衫褲給無衫好著个人著。
17 佢毋做壞事，借錢給人毋拿利息，借東西給人毋會討加兜東西轉去。佢遵行𠊎个法律，服從𠊎个誡命。佢毋使因為厥爸所犯个罪來死，佢一定會有命。
18 總係厥爸欺詐人，搶人个東西，在眾人中間無好行為，佢愛因為自家所犯个罪來喪失生命。
19 「你等還問：孻仔做麼介毋使承擔阿爸所犯个罪呢？𠊎个回答係：孻仔有做正當合理个事；佢遵守𠊎个法律，實行法律个要求，所以佢一定會有命。
20 只有犯罪个人一定愛死。孻仔毋使承擔阿爸个罪；阿爸也毋使承擔孻仔个罪。義人因為行善得報賞；壞人因為作惡受責罰。
21 「若係壞人悔改，離開佢所行个罪惡來遵行𠊎个法律，做正當合理个事，佢就毋使死，一定會有命。
22 佢所犯个罪全部會得到赦免；因為佢做應該做个事，佢一定會有命。
23 你等恅到𠊎—至高个上主歡喜看壞人死掉係麼？毋係恁樣！𠊎甘願看到佢因為悔改還有生命。
24 「若係好人毋肯再做好事，反轉做壞人所做得人惱个壞事，佢敢做得還有命？毋使想！佢以前所做个好事毋會受紀念。佢愛因為背信、犯罪喪失生命。
25 「總係你等講：『主恁樣做係無公平个！』以色列人啊，注意聽啊！你等恅到𠊎恁樣做係無公平係麼？其實，你等所做个正係無公平！
26 好人毋肯再做好事，反轉去做壞事，佢愛因為自家做壞事喪失生命。
27 壞人悔改，開始做正當合理个事，就救到自家个命。
28 佢反省、悔改，所以毋使死，反轉會有生命。
29 以色列人啊，你等講：『主恁樣做係無公平个！』你等恅到𠊎恁樣做係無公平係麼？其實，你等所做个正係無公平！
30 「所以，以色列人啊，𠊎—至高个上主恁樣㧯你等講：𠊎愛照你等逐儕个行為審判你等。你等愛悔改，離開一切个罪惡，免得你等个罪毀滅你等。
31 愛豁掉你等所做一切个壞事，換一個新个心、新个靈！以色列人啊，樣愛使去死哪？
32 𠊎毋歡喜任何人死；所以你等愛悔改，就會有生命！」至高个上主恁樣宣佈了。