Bible

1 𠊎發現在日頭下有一項悲慘个事重重磧在人身上。 2 上帝賜給某人錢財、產業㧯好名聲，佢想愛个無欠一項，總係上帝無俾佢享受，反轉俾生份人享受。這係空虛，也係當悲慘个事。 3 若係有人𫱔一百個子女，在世長壽，總係無享受到麼介福份，死後又無得到安葬；𠊎想，該落胎个孲𤘅仔還比佢較贏。 4 落胎个孲𤘅仔還吂出世就恬恬仔走掉，無人記得佢。 5 佢無看過日頭，麼介也毋知；總係佢比該人較平安。 6 該無享受到福氣个人，就算食兩千歲，到尾敢毋係也愛去共一個所在嗎？ 7 人為到口腹勞碌，總係佢个肚笥毋會滿足。 8 聰明人比戇檔人有麼介較贏呢？窮人在眾人面前知樣般㧯人交往有麼介好處呢？ 9 目珠看到个比心肚妄想个較贏。這也係空虛，係捉風。 10 所有存在个東西早就已經安名了；𠊎等知人係麼介，佢無法度㧯比自家較強大个相爭。 11 因為話越多就越空虛，對人有麼介好處呢？ 12 在這短暫、空虛、就像影仔經過个人生中，麼人知對佢最有價值个事係麼介呢？佢死後世間會發生麼介事，敢有人能㧯佢講？