Ecclesiastes 7
1 好名聲贏過貴重个香水；死日比生日較重要。
2 去喪家贏過去辦喜事个家庭；因為死係逐個人个結局，生人愛將這事放在心肚。
3 憂傷贏過歡笑；面項雖然帶等愁容，總係人心會得到好處。
4 智慧人較愛去喪家；戇人只想去快樂个家。
5 聽智慧人个責備，贏過聽戇人个讚美。
6 戇人个笑聲，就像竻仔在鑊頭下燒个嗶啪聲。這也係空虛。
7 智慧人詐欺別人个時，佢就變做戇人。收買人會敗壞人心。
8 好頭不如好尾。忍耐贏過驕傲。
9 你个心毋好著急到發譴；受氣留在戇人个心胸。
10 毋好講：「做麼介頭擺个日仔比這下較好過？」恁樣問係無智慧个。
11 智慧㧯祖產共樣盡好，對生人盡有價值。
12 智慧㧯金錢共樣會庇蔭人。總係智慧會保全智慧人个生命；這就係有智識个好處。
13 愛思想上帝个作為。佢拗彎个，麼人做得使它變直呢？
14 事事順利个時，你愛歡喜快樂；患難个時，毋好毋記得：喜樂㧯患難攏總有上帝个旨意。無人知將來个事會變做樣般。
15 在空虛个人生𠊎看過盡多个事。好人行善，反轉早死；壞人作惡，顛倒長壽。
16 行善毋好過頭，也毋好聰明過頭，害到自家有麼介好處呢？
17 毋好緊做壞事，也毋好做戇人，恁早死做麼介呢？
18 敬畏上帝个人這兩項原則攏總愛遵守，毋好單單守一項。
19 智慧給人个能力贏過城肚十個官員个能力。
20 世上無好人一直行善又毋識犯過罪。
21 毋好將別人个話全部放在心肚；驚怕你會聽到僕人咒罵你。
22 因為你心肚知，你也識輒輒咒罵別人。
23 𠊎識用𠊎个智慧試過這所有个事。𠊎決心尋求智慧，總係智慧還係離𠊎當遠。
24 麼人做得尋出生命个意義呢？這係忒深，當難了解。
25 𠊎一心一意愛知、愛研究、愛尋智慧㧯萬事个理由；𠊎又愛了解邪惡、無知、戇檔㧯癲狂。
26 𠊎發現該婦人家比死還較得人驚：姖个愛情像陷阱、像羅網；姖个手像鎖鍊恁樣揇等你。上帝所歡喜个人就會脫離姖个手，總係有罪个人會被姖纏到。
27 傳道者講：這係𠊎尋答案个時，一些一些仔發現出來个。
28 𠊎想愛尋出其他个答案，總係尋毋到。有人講：「在一千個男人中，𠊎尋到一個正直个人，總係在女人中，一個也尋毋到。」
29 總係，𠊎所學到个只有一件事：上帝所造个人本來係正直个，總係佢等想出盡多詭計。