Deuteronomy 4
1 摩西勸勉人民講：「以色列人哪，這下你等愛聽從𠊎教你等个法律㧯例規；恁樣，你等正能生存，又做得入去佔領上主—你等祖先个上帝所賜給你等个土地。
2 𠊎所命令你等个話，你等毋好加添，也做毋得減少。你等一定愛遵行𠊎所吩咐上主—你等上帝个誡命。
3 你等親目看過上主在批珥山所做个事。上主—你等个上帝在該位消滅所有拜巴力个人，
4 只有你這兜對上主—你等个上帝忠心个人到今晡日還在。
5 「𠊎遵照上主—𠊎上帝个命令，將所有个法律㧯例規教你等；俾你等在愛去佔領个土地上遵守。
6 你等一定愛確實遵行；恁樣正有好向萬民顯明你等个聰明智慧。佢等一聽到這兜法律，就會講：『這偉大國家个人民實在真聰明、真有智慧！』
7 「無論幾強大个國家，它个神明無一個親近它个國民像上主—𠊎等个上帝恁樣㧯𠊎等親近；𠊎等求喊佢，佢就答應。
8 無論幾強大个國家，它个法律㧯例規無一種像今晡日𠊎交給你等个法律恁公正。
9 你等愛細膩！愛記在你等个心中！一生人毋好毋記得親目看過个這兜事。你等愛教你等个子女㧯子孫講，
10 頭擺你等識在何烈山山腳，企在上主—你等上帝个面前。該時，上主㧯𠊎講：『你愛將人民聚集共下。𠊎愛佢等聽到𠊎講个話，使佢等學習一生人敬畏𠊎，也教佢等个子女敬畏𠊎。』
11 「恁樣，你等全部來企在山下。山頂烏雲賁賁，火焰衝天，又有濃煙衝等上。
12 上主對火焰中對你等講話，你等單淨聽到佢講話个聲，總係看毋到佢个形像。
13 佢對你等宣佈佢㧯你等立个約，愛你等遵行十條誡命。佢將這十條誡命寫在兩垤石版面頂。
14 該時上主命令𠊎將法律㧯例規全部教你等；愛你等過河並佔領該垤土地後，確實遵行。」
15 「上主在何烈山頂，對火焰中㧯你等講話个時，你等無看到麼介形像。所以，你等愛特別注意，
16 做毋得為自家造㖠種形像个偶像來敗壞自家，無論係男个抑係女个偶像、
17 係像地上个野獸抑係天頂个飛鳥、
18 係像地上个爬蟲抑係水中个魚類，全部做毋得。
19 你等也做毋得陷入誘惑，去拜你等所看到个日月星辰這兜天頂个星球。這兜係上主—你等个上帝擺好在萬民面前个。
20 總係你等係上主對埃及、對鎔鐵个火爐肚搶救出來个。佢𢱋你等出來，愛你等做佢自家个子民，就像今晡日恁樣。
21 因為你等个緣故，上主—你等个上帝向𠊎發譴，發誓不准𠊎過約旦河，進入佢愛賜給你等該盡肥个土地。
22 𠊎會死在這位，做毋得過約旦河；總係你等愛過河，佔領該盡肥个土地。
23 你等愛細膩，做毋得毋記得上主—你等个上帝㧯你等立个約。做毋得為自家造上主所禁止个偶像。
24 因為上主—你等个上帝就像一團烈火，係專情个上帝。
25 「就算你等在該地住當久，有子孫，也做毋得造㖠種形像个偶像，來敗壞自家。這在上主—你等上帝个眼中係邪惡个，會惹佢發譴。
26 今晡日，𠊎喊天喊地來做見證，若係你等毋聽從𠊎，當遽就會對該土地上消滅。你等過約旦河、佔到該土地以後，就毋使想愛長長久久住在該位。
27 上主會將你等打散逐到各國，在該位存下來个只有少數人。
28 在該位，你等會拜人用樹仔㧯石頭雕刻个神明，係毋會看、毋會聽、毋會食、毋會鼻个偶像。
29 總係，你等在該位愛尋求上主—你等个上帝；若係你等專心一意尋求佢，就會尋到佢。
30 你等堵到災難、受盡痛苦个時，到尾愛歸向上主—你等个上帝，聽從佢。
31 上主—你等个上帝係憐憫个上帝，佢絕對毋會㧒掉你等，毋會消滅你等；佢毋會毋記得㧯你等个祖先所立个約。
32 「你等愛研究歷史，對你等出世以前，一直查到上帝在地上創造人類个時。你等愛查遍全世界，有麼人看過抑係聽過這恁偉大个事？
33 有㖠個民族聽到上帝對火焰中㧯佢等講話，像你等聽到，還有命呢？
34 上主—你等个上帝在埃及為你等所做个事，有㖠個神明識恁樣做、敢將一個民族對另外一個國家搶救出來，成做自家个子民？你等親目看到佢用大能大力，降下瘟仔㧯戰爭，行神蹟奇事，俾這兜得人驚个事發生。
35 「上主對你等顯示這兜，係愛證明只有佢係上帝；除了佢以外，無別个上帝。
36 佢使你等聽到佢對天頂發出个聲音，用恁樣來教訓你等，又使你等在地上看到佢神聖个火，並聽到佢對火焰中㧯你等講話。
37 佢因為痛惜你等个祖先，就揀選你等，用自家个大能大力，親自𢱋你等出埃及。
38 你等前進个時，佢就將該兜比你等較強大个民族逐出去，為到愛𢱋你等入去，將佢等个土地賜給你等做產業。今晡日你等正會得到這垤土地。
39 所以，你等愛知，也愛記在心肚，天地間只有上主係上帝；除了佢以外，無別个上帝。
40 今晡日，𠊎將佢个法律㧯誡命頒佈給你等；你等愛遵行。恁樣，你等㧯你等个子孫一定會事事順利。你等會繼續住在上主—你等个上帝賜給你等做永久產業个這垤土地。」
41 後來，摩西在約旦河東片指定三座城做逃閃城。
42 這種城係為到該兜因為過失、毋係故意㓾死人个來設立个。這種人做得入到逃閃城，免得被人處死。
43 摩西在呂便支族个地區指定曠野高原上个比悉城，在迦得支族个地區指定基列个拉末城，在瑪拿西支族个地區指定巴珊个哥蘭城，做逃閃城。
44 摩西將以下个法律交給以色列人。
47 佔領佢㧯巴珊王噩个土地。這兩個亞摩利王个土地全部在約旦河東片，
48 南片對亞嫩山壢堘頭个亞羅珥到北片个西連山，就係黑門山。
49 這垤土地也包含約旦河東片个歸隻地區，南片到死海，東片到比斯迦山个山腳。