Deuteronomy 3
1 「接等，𠊎等再向北片愛去巴珊地區。巴珊王噩帶領佢个全軍出來，在以得來城附近㧯𠊎等相㓾。
2 上主對𠊎講：『你等毋使驚！𠊎愛將佢、佢个人民，㧯佢个土地全部交在你等手中。以前你等樣般對待該京城在希實本个亞摩利王西宏，這下也愛照樣對待巴珊王。』
3 「對恁樣，上主—𠊎等个上帝也將巴珊王噩㧯佢个人民交在𠊎等手中。𠊎等將佢等全部消滅，連一個也無留。
4 同時，𠊎等佔領佢所有个城鎮，無一座城無佔領。𠊎等就佔領巴珊王噩統治个歸隻亞珥歌伯地區，一共有六十座城；
5 這兜城全部有堅固个防備：有高牆、城門㧯門閂。𠊎等也佔領其他無城牆个村莊。
6 𠊎等毀滅所有个城鎮，將城肚个人，無分男女老幼，全部㓾淨淨，像以前𠊎等毀滅希實本王西宏所有个城鎮共樣。
7 𠊎等將頭牲㧯城肚个財物攏總搶淨淨。
8 「該時，𠊎等對兩個亞摩利王个手，將約旦河東片个土地搶過來，對南部个亞嫩山壢直到北部个黑門山。
9 (西頓人將黑門山喊做西連；亞摩利人喊它示尼珥。)
10 𠊎等佔領巴珊王噩所有个城鎮：包含平原个逐城鎮、基列㧯巴珊歸隻地區，東片到撒迦㧯以得來城。」
11 (巴珊王噩係最後一個利乏音人。佢个棺材係用石頭做个，照普通个尺寸，長四公尺，闊兩公尺。在亞捫人个拉巴城肚還看得到這副棺材。)
12 「𠊎等佔領這片土地以後，𠊎將亞嫩山壢堘頭个亞羅珥城以北地區㧯基列山區个一半，還有這地區个城鎮，分給呂便㧯迦得支族。
13 𠊎又將基列其他个地區㧯巴珊王噩个歸隻地區分給瑪拿西个半支族。」(巴珊地區又喊做利乏音地。
14 瑪拿西半支族个睚珥佔領歸隻亞珥歌伯地區，就係巴珊歸隻地區，對該位直到基述人㧯瑪迦人交界个地方。睚珥用自家个名將該地个城鎮安到哈倭特‧睚珥，到今晡日還係恁樣。)
15 「𠊎將基列分給瑪拿西支族个瑪吉宗族，
16 將基列到亞嫩山壢个一垤土地分給呂便㧯迦得支族。佢等南片个邊界在亞嫩山壢中央，北片个邊界係雅博山壢，其中一部份㧯亞捫人个邊界相接。
17 佢等西片个界限到約旦河，對北片个加利利湖到南片个死海，東到比斯迦山山腳。
18 「該時，𠊎指示佢等講：『上主—你等个上帝將約旦河東片个土地賜給你等，使你等佔領這垤土地。這下，你等愛將軍隊武裝起來，派佢等為以色列逐支族打頭陣，過約旦河，幫助逐支族佔領上主賜給佢等个土地。
19 總係你等个𡜵娘、子女、㧯頭牲(𠊎知你等有盡多頭牲)做得留在𠊎分給你等个城鎮。
20 你等愛幫助同胞佔領上主所賜約旦河西片个土地，直到上主使佢等住在該位，像佢使你等在這位住共樣。該時，你等就做得轉到𠊎分給你等个這垤土地。』
21 「然後，𠊎指示約書亞講：『你已經親目看到上主—你等个上帝對西宏㧯噩兩個王所做个事；上主也愛恁樣對待你等愛去佔領个其他國家。
22 你等毋使驚佢等，因為上主—你等个上帝愛為你等相㓾。』」
23 「該時，𠊎祈求上主：
24 『至高个上主啊！𠊎知你已經開始向你个僕人顯明你偉大、奇妙个作為。天地之間無其他神明能做你所做个大事！
25 求你准𠊎過約旦河，去看該片盡靚个土地、美麗个山區，㧯黎巴嫩山。』
26 「總係因為你等个緣故，上主向𠊎發譴，毋聽𠊎个祈求。佢對𠊎講：『好了哪！這件事毋使講了！
27 你上比斯迦山頂去，對該位遠遠看東西南北四方。你愛詳細看，因為你做毋得過這約旦河。
28 你愛指導約書亞，也愛堅定佢个心志，使佢勇敢，因為佢愛帶領人民過河，佔領你所看到个土地。』
29 所以，𠊎等留在伯‧批珥對面个山壢。」