Deuteronomy 5
1 摩西召集所有个以色列人，對佢等講：「以色列人哪，愛注意聽𠊎今晡日向你等頒佈个法律㧯例規。你等愛學習，又愛確實遵守。
2 上主—𠊎等个上帝在何烈山㧯𠊎等立約。
3 上主毋單淨㧯𠊎等个祖先立這約，也係㧯𠊎等今晡日在這位還生等个人立約。
4 上主在該山頂，對火焰中面對面㧯你等講話。
5 該時，𠊎企在你等㧯上主中間，愛向你等傳上主个話；因為你等驚該火，毋敢上山。
6 「上主講：『𠊎係上主—你个上帝；𠊎識𢱋你對做奴才个埃及地出來。
7 「『𠊎以外，你做毋得敬拜別个神明。
8 「『做毋得為自家雕刻偶像；也做毋得造天頂、地上、抑係地底下、水中所有个形像。
9 做毋得向該兜偶像跪拜，也做毋得服事它兜，因為𠊎—上主—你个上帝係專情个上帝。恨𠊎个人，𠊎一定會責罰佢等㧯佢等个子女，直到三四代。
10 總係敬愛𠊎、遵守𠊎命令个人，𠊎愛用慈愛款待佢等，直到千代。
11 「『做毋得糮糝用上主—你上帝个名；因為糮糝用上主名个人，上主一定會責罰佢。
12 「『愛遵照上主—你上帝个命令，遵守安息日做聖日。
13 你有六日好勞碌做一切个工作；
14 總係第七日係屬上主—你上帝个安息日。這日，無論係你、你个子女、奴僕、奴婢、牛、驢、頭牲抑係城內暫住个旅客，全部做毋得工作。你个奴僕、奴婢一定愛㧯你共樣歇睏。
15 你愛記得，你識在埃及做過奴才；上主—你个上帝用大能大力將你對該位救出來。所以，上主—你个上帝命令你，一定愛守安息日。
16 「『愛照上主—你上帝个命令孝敬爺𡟓，好俾你事事順利，在上主—你上帝愛賜給你个土地上享長壽。
17 「『做毋得㓾人。
18 「『做毋得犯姦淫。
19 「『做毋得偷拿。
20 「『做毋得做假見證害人。
21 「『做毋得貪別人个𡜵娘；也做毋得貪別人个屋、土地、奴僕、奴婢、牛、驢，抑係其他个東西。』
22 「這係你等全會眾在山頂聚集个時，上主向你等頒佈个誡命。該時，佢對火焰中、烏雲中，㧯濃煙中向你等大聲講話。佢只有頒佈這兜誡命。後來佢將這兜誡命寫在兩垤石版面頂，交給𠊎。」
23 「當時，歸隻山全部𤏸火；你等聽到有聲對烏暗中發出。各支族个領袖㧯該兜長老全部來見𠊎，
24 講：『𠊎等聽到上主—𠊎等个上帝對火焰中㧯𠊎等講話，佢向𠊎等顯明佢个榮光㧯大能！今晡日，𠊎等體驗到，就算上帝㧯人講話，人還係生等。
25 總係這下，𠊎等樣愛使冒生命个危險呢？該得人驚个火焰會消滅𠊎等。若係𠊎等再聽到上主—𠊎等上帝个聲，𠊎等一定會死。
26 人類當中有麼人像𠊎等聽過永生上帝對火焰中發出个聲還有命呢？
27 摩西啊，請你行前去，注意聽上主—𠊎等上帝所講个話，然後吩咐𠊎等。𠊎等會聽，又會遵行。』
28 「上主聽到這話就對𠊎講：『𠊎已經聽到這兜人所講个話。佢等所講个盡著，
29 𠊎盡希望佢等常常有恁樣个心，從頭到尾敬畏𠊎，遵行𠊎所有个誡命，使佢等㧯佢等个子孫事事順利。
30 你愛㧯佢等講，喊佢等轉自家个帳篷去。
31 總係你愛留在𠊎這位；𠊎愛將所有个誡命、法律㧯例規全部交託你。你愛教佢等，俾佢等在𠊎賜給佢等个土地上確實遵行。』
32 「以色列人哪，你等愛細膩，一定愛遵行上主—你等个上帝所吩咐你等个命令，無論㖠條都做毋得偏差；
33 愛全部遵行。恁樣，你等就會生存下去，事事順利，在你等愛去佔領个土地上住久久。」