Deuteronomy 11
1 「你等應當敬愛上主—你等个上帝，從頭到尾遵守佢所有个法律、例規㧯誡命。
2 愛知，𠊎今晡日係對你等講話，毋係對你等个子女講話，因為係你等親身體驗上主—你等上帝个管教，來認識佢。你等看過上主个偉大、權柄、能力，
3 㧯神蹟。你等親目看到佢樣般對付埃及王㧯佢个國家，
4 也看到佢樣般消滅埃及个軍隊、戰馬㧯戰車。佢等追你等个時，上主使紅海浸掉佢等，將佢等徹底消滅。
5 你等知，你等來到這地以前，在曠野中，上主為你等所做个一切。
6 你等記得佢樣般對付呂便个後代、以利押个孻仔大坍㧯亞比蘭。大地在以色列眾人面前裂開，將佢等㧯佢等个家族、帳篷、㧯所有个僕人、頭牲全部吞落去。
7 你等親目看到上主所做這一切偉大个事。」
8 「你等愛遵守𠊎今晡日吩咐你等所有个誡命，恁樣你等正會有力量，做得過河佔領你等愛入去个土地，
9 在上主應許給你等个祖先㧯子孫、該流乳㧯蜜盡肥个土地上享受長久个日仔。
10 你等愛入去佔領个土地毋係像你等離開个埃及。在埃及，你等委種以後還愛辛苦踏水車淹水正有收成，
11 總係你等愛過河佔領个土地有山、有谷、有雨水个滋潤。
12 上主—你等个上帝對年頭到年尾一直看顧這土地。
13 「所以，你等愛認真遵行𠊎今晡日頒佈給你等个誡命，敬愛上主—你等个上帝，一心一意事奉佢。
14 恁樣，佢就會照時給你等春雨、秋水，使你等有罅額个五榖、新酒、橄欖油，
15 㧯畜頭牲个草料。你等會食到飽足。
16 你等愛細膩，免得心肝受到引誘，害你等背叛上主，去服事跪拜別个神明。
17 若係毋聽，上主會向你等發譴，毋落水給你等，使土地燥旱，毋會出產五榖；就算佢賜給你等个係盡靚个土地，你等也會當遽在該位消滅。
18 「所以，你等愛記得這兜誡命，放在心肚。愛將這兜誡命做記號，䌈在手項、戴在額頭。
19 你等愛將這兜誡命教你等个子女，無論在屋下抑係出外，歇睏抑係做工，愛常常談論這兜誡命。
20 你等愛將這兜誡命寫在屋下个門框㧯大門。
21 恁樣，你等㧯你等个子女就會在上主所應許給你等祖先个土地上享受長久个日仔；天地存在幾久，你等就住在該位幾久。
22 「你等愛認真遵行𠊎頒佈給你等所有个誡命，敬愛上主—你等个上帝，實行佢个道，對佢忠心。
23 恁樣，你等入去个時，上主會逐出各民族，使你等佔領比你等較強大个民族个土地。
24 你等腳所行過个土地全部愛歸給你等。你等个地界愛對南片个曠野到北片个黎巴嫩山，對東片个幼發拉底河到西片个地中海。
25 無一儕在你等面前企得住。你等無論到㖠位去，上主—你等个上帝愛照佢个應許使你等大大得勝；無人毋驚你等。
26 「看哪，𠊎今晡日將祝福㧯咒詛擺在你等面前，俾你等自家來選。
27 若係你等遵行𠊎今晡日吩咐你等，就係上主—你等上帝个所有誡命，就會得到祝福。
28 若係你等毋遵行這兜誡命，轉向你等從來毋認識个神明，去跈它兜，就會受咒詛。
29 當上主—你等个上帝帶領你等入去你等愛佔領个土地以後，你等愛在基利心山宣佈祝福个話，在以巴路山宣佈咒詛个話。
30 (這兩座山全部在約旦河西片日頭落山个所在，係山壢个迦南人个土地，在吉甲个西片，偎近摩利聖樹。)
31 你等黏時愛過約旦河，去佔領上主—你等个上帝所賜給你等个土地。你等佔領該土地，在該位安居以後，
32 一定愛遵行𠊎今晡日吩咐你等个所有法律。」