Deuteronomy 10
1 「該時，上主對𠊎講：『你愛鑿兩垤石版，像以前該兩垤，又愛用枋仔做一個放石版个樹櫃仔。你愛上山，來到𠊎這位。
2 𠊎愛將你抨碎該兩垤石版面頂所寫个約重新寫在這兩垤石版面頂。你愛將石版放在櫃肚。』
3 「然後𠊎用金合歡木做一隻櫃仔，又鑿兩垤石版，像以前該兩垤；𠊎帶石版上山。
4 以前你等聚集个時，上主在山頂對火焰中向你等宣佈十條誡命。佢將這兜誡命重新寫在這兩垤石版，然後交給𠊎。
5 𠊎轉身下山，遵照上主个命令將這兩垤石版放在𠊎造个櫃肚，到這下還在該位。」
6 (以色列人對亞干人个井該位出發，來到摩西拉。亞倫死在該位、埋在該位。佢个孻仔以利亞撒承接佢做祭司。
7 以色列人離開該位，來到谷歌大，然後到約巴他；這位水源充足。
8 在何烈山个時，上主指派利未支族个人扛上主个約櫃，做祭司事奉佢，奉佢个名祝福。到今晡日，利未支族个子孫還係擔任這職份。
9 所以，利未支族無像其他支族分到土地；佢等照上主—你等上帝个應許，享受上主做佢等个產業。)
10 「像上擺恁樣，𠊎在山頂停留四十日夜；上主又一擺聽𠊎个祈禱，答應毋消滅你等。
11 佢命令𠊎，喊𠊎𢱋你等出發，使你等入去佔領佢應許愛賜給你等祖先个土地。」
12 「以色列人哪，愛注意聽上主—你等个上帝對你等个要求。你等愛敬畏上主—你等个上帝，遵行佢个道。你等愛一心一意敬愛佢，事奉佢，
13 遵守佢个誡命。為到你等个幸福，𠊎今晡日向你等頒佈上主个法律。
14 天㧯至高个天係上主—你等上帝个；大地㧯地上所有个也全部屬佢。
15 上主惜你等个祖先，所以對萬民中只有揀選你等成做佢自家个子民。到今晡日，你等還係佢个選民。
16 所以從今以後，你等愛將心肚个垃圾除掉，毋好再硬頸。
17 因為上主—你等个上帝係萬神个神，萬主个主。佢係至大、全能、應該受敬畏个上帝。佢無偏心，也毋被人收買。
18 佢為孤兒㧯寡婦伸冤，也惜你等當中个外族人，賜給佢等食个㧯著个。
19 所以，你等應該惜外族人，因為你等在埃及也做過外族人。
20 你等愛敬畏上主—你等个上帝，愛事奉佢。你等愛對佢忠心，奉佢个名正做得發誓。
21 你等愛稱頌佢，因為佢係你等个上帝；你等親目看到佢為你等做奇妙偉大个事。
22 你等个祖先到埃及个時只有七十儕，這下，上主—你等个上帝使你等个人數增加到像天頂个星仔恁多。」