Deuteronomy 12
1 「你等住在上主—你等祖先个上帝賜給你等土地个時，愛一生人認真遵守這所有个法律㧯誡命。
2 你等佔領該垤土地、逐出該兜民族以後，愛將佢等拜神明个逐所在，無論在高山、細山、抑係在逐頭大樹下，全部滅掉。
3 你等也愛拆掉佢等个祭壇，打碎佢等个神柱，燒掉亞舍拉女神像，斬斷佢等个偶像，恁樣將佢等个名對該兜所在除掉。
4 「你等做毋得學該兜民族个方式來敬拜上主—你等个上帝。
5 反轉，對你等各支族个地區中，上主—你等个上帝愛選一個所在，來設立佢个名，俾你等在該位敬拜佢。
6 你等愛到該所在獻燒化祭㧯其他牲儀、十分之一个祭物、供物、還願祭、甘心祭㧯頭胎个牛羊。
7 你等㧯屋下个人全部愛去該位，在該賜福給你等，上主—你等上帝个面前啉食，享受你等煞猛得來个好東西。
10 你等過約旦河後，上主—你等个上帝愛使你等佔領該垤土地，在該位住。佢愛保護你等無受四周圍个對敵侵害，使你等安居樂業。
11 上主—你等个上帝愛選一個所在來設立佢个名；你等愛帶等𠊎命令你等愛獻个所有祭物，到該位敬拜佢，就係帶燒化祭㧯其他个牲儀、十分之一个祭物㧯供物，㧯許願愛獻給上主所有好个禮物。
12 你等愛㧯你等个子女、奴僕、奴婢、並住在你等城肚个利未人，共下在上主—你等上帝个面前歡喜快樂；愛記得利未支族無自家个產業。
13 你等愛細膩，做毋得隨便選獻祭个所在；
14 你等一定愛到上主在你等某一支族所選定个所在獻祭。你等只有做得在該位獻燒化祭，遵行𠊎命令你等所有个事。
15 「你等無論住在麼介城肚，上主—你等个上帝所賜給你等个頭牲，你等全部做得照自家个意思㓾掉，食牠兜个肉。無論在禮儀上係淨浰抑係無淨浰个人，全部做得食，像食野鹿抑係羚羊个肉恁樣。
16 總係你等做毋得食血，愛將它倒在地上，像倒水一樣。
17 你等做毋得在自家住个城肚食獻給上主个祭物，就係五榖、酒㧯橄欖油个十分之一、頭胎个牛羊、許願愛獻个祭、甘心祭，抑係一切其他个祭物。
18 你等㧯你等个子女、奴僕、奴婢、並住在你等城肚个利未人，只有做得在上主—你等个上帝所選个所在，在上主面前食祭物。你等愛在該位享受自家所做个一切，歡喜快樂。
19 你等愛細膩，在自家土地上住个時，做毋得無顧到利未支族个人。
20 「在上主—你等个上帝照應許發展你等个土地後，你等做得照自家个意思食肉。
21 若係上主—你等个上帝所選愛設立佢名个所在離你等當遠，你等就做得照𠊎所吩咐个，將上主賜給你等个牛羊㓾掉，在你等住个城肚照自家个意思食肉。
22 無論在禮儀上係淨浰抑係無淨浰个人，全部做得食，像食野鹿㧯羚羊个肉恁樣。
23 總係你等絕對做毋得食血，因為血係生命，你等做毋得將生命㧯肉共下食落去。
24 你等絕對做毋得食血，愛將它倒在地上，像倒水一樣。
25 若係你等遵行這誡命，上主就會歡喜；你等㧯子孫全部會事事順利。
26 愛將你等分別為聖个祭物㧯許願愛獻个祭帶到上主所選个所在，
27 在該位獻燒化祭，連肉帶血放在上主—你等上帝个祭壇頂來燒。你等也愛在該所在獻其他个牲儀，將血倒在上主—你等上帝个祭壇頂，食牠兜个肉。
28 你等愛認真遵守𠊎所吩咐个命令，你等㧯子孫就會長久事事順利；因為你等做个事係好个，係上主—你等个上帝所歡喜个。」
29 「你等佔領各民族个土地後，上主—你等个上帝愛消滅這兜民族。你等愛佔領佢等个土地，在該位住。
30 上主消滅這兜民族後，你等愛細膩，做毋得跈佢等个宗教風俗，因為該會帶來悲慘个結局。你等也做毋得問佢等樣般拜佢等个神明，做毋得學佢等个儀式，
31 做毋得用佢等个儀式來敬拜上主—你等个上帝，因為佢等在崇拜中做上主所惱个事。佢等甚至用自家个子女做牲儀，在祭壇頂燒，獻給佢等个神明。
32 「你等愛確實遵守𠊎所吩咐个誡命，做毋得加添，也做毋得減少。」