1有人㧯大衛講：「非利士人這下攻打基伊拉城，緊搶正收成个五榖。」
2大衛就求問上主：「𠊎應該去攻打該兜非利士人麼？」上主應講：「你去攻打佢等，救基伊拉城。」
3總係，大衛个部下對佢講：「𠊎等在猶大就驚到會死，到基伊拉去攻打非利士人个軍隊敢毋係還較慘？」
4所以大衛又求問上主。上主應佢講：「做你去基伊拉！𠊎會使你打贏非利士人。」
5大衛㧯佢个部下就去基伊拉攻打非利士人。佢等㓾死當多敵人，又捉轉來敵人个頭牲。恁樣，大衛就救到基伊拉城个人。
6亞希米勒个孻仔亞比亞他逃到基伊拉去投靠大衛該時，有將以弗得帶等去。
7掃羅知大衛到基伊拉去了，就講：「上帝已經將佢交在𠊎手中了。大衛走到一個有牆、有門閂个城肚去，就係自家陷入羅網。」
8所以掃羅召集軍隊準備作戰，向基伊拉進軍，愛圍攻大衛㧯佢个部下。
9大衛知掃羅計劃攻打佢，就對祭司亞比亞他講：「將以弗得帶到這位來。」
10大衛講：「上主—以色列个上帝啊，你个僕人確實聽講掃羅計劃到基伊拉來，為到𠊎个緣故愛毀滅這城。
11基伊拉人民會將𠊎交給掃羅麼？你个僕人聽講掃羅愛來，佢斷真會來麼？上主—以色列个上帝啊，懇求你㧯僕人講！」上主應講：「掃羅會來。」
12大衛又問：「恁樣，基伊拉个人民會將𠊎㧯𠊎个部下交給掃羅麼？」上主講：「會！」
13所以，大衛㧯佢个部下約有六百人黏時離開基伊拉到處流浪。掃羅聽到大衛已經逃走離開基伊拉就取消原來个計劃。
14大衛囥在西弗曠野該片个山寨肚。掃羅一直在尋佢，總係上帝毋將大衛交給佢。
15大衛也清楚掃羅決心愛㓾佢。大衛在偎近西弗曠野个哈列時，
16掃羅个孻仔約拿單來見佢，鼓勵佢倚靠上帝來得到剛強，
17對佢講：「毋使驚！吾爸掃羅無辦法害你；你將來一定會做以色列个王，𠊎个地位也會在你底下、擺第二位。這事吾爸乜當清楚。」
18兩儕在上主面前重新結做生死朋友。大衛留在哈列；約拿單就轉屋下去。
19有兜人對西弗到基比亞去見掃羅，講：「大衛囥在𠊎等該片，在猶大曠野个南部，哈基拉山頂，哈列个山寨肚。
20𠊎等知國王當想愛捉佢；請到𠊎等該片去，𠊎等一定會協助國王捉到佢。」
21掃羅講：「你等對𠊎盡好。願上主賜福給你等！
22你等轉去，再一擺查較清楚兜仔，佢在㖠位，麼人看過佢。𠊎聽講佢當搞怪。
23你等去查明佢所有囥个所在，黏時倒轉來報告，𠊎就㧯你等去。若係佢還在這個地區，就算愛將猶大个各宗族尋到揙轉來，𠊎也愛將佢搜出來。」
24所以，這兜人出發，比掃羅先轉到西弗去。大衛㧯佢个部下囥在瑪雲曠野，在猶大南片个山壢肚。
25掃羅帶佢个部下出發搜查大衛；大衛聽到風聲，就向瑪雲曠野逃走，囥在一個大巖石後背。掃羅聽到，就去逐佢。
26掃羅㧯佢个部下在巖石這片行；大衛㧯佢个部下在另外一片行，愛遽遽逃走。掃羅這片个人已經離佢等當近，會捉到佢等个時，
27就有一個使者到來，向掃羅報告講：「遽遽轉去！非利士人來侵犯𠊎等个土地囉！」
28所以掃羅停下來、無繼續逐大衛，就轉去打非利士人。所以該所在被人喊做「隔離个巖石」。
29大衛離開該位，去隱‧基底地區，囥在該片个山寨肚。