1大衛對迦特城逃到偎近亞杜蘭城个一個山窿。佢个兄弟㧯家族聽講佢在該位，全部去看佢。
2所有被人欺負个、欠債个，㧯不滿現況个人全部集合到佢該位去；人數約有四百儕。大衛就做佢等个領袖。
3大衛對該位去摩押个米斯巴，對摩押王講：「求你准𠊎个爺𡟓住在你這位，等到𠊎知上帝樣般為𠊎安排正來做打算。」
4恁樣，大衛將爺𡟓搭摩押王。佢囥在山寨肚該站期間，佢个爺𡟓一直住在該位。
5後來，先知迦得來對大衛講：「毋好再停留在這山寨肚；趕緊到猶大去。」所以大衛離開該位，去哈列个樹林。
6有一日，掃羅在基比亞，坐在山崎頂一頭柳樹下，手項拿等槍。佢所有个官員企在佢身邊。掃羅聽講，有人發現大衛㧯佢手下囥个所在。
7掃羅就對官員講：「便雅憫人哪，愛聽𠊎个話！你等恅到耶西个孻仔會將田地㧯葡萄園給你等，會設立你等在軍隊肚做軍官嗎？
8你等陰謀愛對抗𠊎係麼？𠊎自家个孻仔㧯耶西个孻仔結盟，你等樣無㧯𠊎報告。無人關心𠊎；也無人㧯𠊎講𠊎个部下大衛今晡日尋機會愛㓾𠊎，𠊎个孻仔還唆慫佢！」
9以東人多益㧯掃羅其他个官員企共下；佢應講：「耶西个孻仔大衛到挪伯城、到亞希突个孻仔亞希米勒該位个時，𠊎有看到佢。
10亞希米勒為大衛求問上主，然後將糧食㧯非利士人歌利亞該支刀交給佢。」
11所以，掃羅王派人去喊祭司亞希突个孻仔亞希米勒㧯佢个家族，就係所有在挪伯做祭司个人；佢等全部就來見王。
12掃羅對亞希米勒講：「亞希突个孻仔，聽好！」亞希米勒應講：「國王，請吩咐！」
13掃羅對佢講：「你做麼介㧯耶西个孻仔謀害𠊎？做麼介給佢糧食㧯刀仔，又為佢求問上帝？佢這下悖逆𠊎、今晡日尋機會愛㓾𠊎！」
14亞希米勒應王講：「大衛係國王最忠心个官員，係國王个婿郎，國王个侍衛長，又係宮廷肚最受敬重个人。
15𠊎確實為佢求問過上帝，這乜毋係第一擺！請國王毋好將罪歸給𠊎㧯𠊎个家族，因為若僕人完全毋知這件事！」
16王講：「亞希米勒，你㧯你家族所有个人全部該死！」
17然後王對企在身邊个侍衛講：「去㓾上主个祭司！佢等㧯大衛同謀，又知大衛逃到這位來，乜無向𠊎報告。」總係王个侍衛毋敢出手㓾上主个祭司。
18所以王吩咐多益講：「去㓾該兜祭司！」以東人多益就將佢等全部㓾掉。該日，多益親手㓾掉八十五個有資格著以弗得个祭司。
19佢又將住在挪伯—祭司城个其他人民全部處死，無論男女、細人仔抑係孲𤘅仔，並牛、羊、驢仔全部㓾掉。
20總係，亞希米勒个一個孻仔亞比亞他逃去投靠大衛。
21亞比亞他㧯大衛講，掃羅樣般㓾掉該兜上主个祭司。
22大衛對亞比亞他講：「𠊎該日看到以東人多益在該位，就知佢一定會去向掃羅報告。你家族个死，𠊎對逐儕全部有責任。
23請你留在𠊎這位，毋使驚。掃羅想愛㓾𫣆兩儕，總係你留在𠊎這位會安全。」