1掃羅逐非利士人，轉來聽到大衛在隱‧基底个曠野，
2就帶領以色列最精良个軍隊三千名，到「野山羊个巖石」搜查大衛㧯佢个部下。
3掃羅來到路堘羊欄附近个一個山窿，入底背去屙屎，堵好大衛㧯跈佢个人囥在這山窿最底背。
4大衛个部下對佢講：「你个機會到了！上主㧯你講過，佢愛將你个敵人交在你手中，你做得照自家个意思處理佢。」大衛恬恬仔爬過去，割下掃羅外衫个一角。
5後來大衛為到所做个事心肚無平安，
6就對部下講：「願上主阻擋𠊎做出傷害𠊎主人个事；佢係上主膏油立个君王！𠊎絕對做毋得傷害佢；因為佢係王，係上主膏油設立个。」
7大衛盡勸佢个部下，毋准佢等傷害掃羅。掃羅䟘起來，行出山窿，做佢離開；
8大衛出來跈在佢後背，大聲喊：「𠊎个主人！𠊎个王！」掃羅轉過身來看，大衛就伏在地上拜佢，講：
9「人講𠊎想愛傷害你，國王做麼介相信呢？
10請你自家看，今晡日在山窿肚，上主將你交在𠊎手中。𠊎个部下有人喊𠊎㓾你，總係𠊎痛惜你；𠊎講，𠊎絕對毋傷害𠊎个主人，因為你係上主膏油設立个王。
11吾爸，請看！𠊎手中揢等你外衫个一角！𠊎愛㓾你盡簡單，總係𠊎只有割下這垤衫角。恁樣你應該相信，𠊎無悖逆抑係傷害你个想法。雖然𠊎無做麼介對毋起你个事，你還係逐所在尋𠊎，愛㓾𠊎。
12願上主判斷你㧯𠊎中間个是非。願上主代𠊎伸冤，因為𠊎毋會傷害你。
13古人有俗語講：『壞人正會做壞事。』所以𠊎絕對毋會傷害你。
14以色列王出來愛㓾麼儕！你愛逐麼人！係一條死狗、一隻跳蚤定定！
15上主會審判，會判斷你㧯𠊎中間个是非。願佢鑒察𠊎，為𠊎伸冤，救𠊎脫離你个手。」
16大衛講煞，掃羅講：「𠊎个孻仔大衛，敢斷真係你？」接等，掃羅就開聲大噭，
17對大衛講：「你正著，𠊎毋著了。𠊎恁樣用怨恨對待你，你還係用善良款待𠊎。
18今晡日，你已經表現你係樣般善良；因為上主雖然將𠊎交在你手中，總係你無㓾𠊎。
19人若係捉到敵人，樣會放佢平安無事走？願上主因為你今晡日對𠊎所做个賜福給你！
20這下𠊎知你一定會做以色列个王，國家也會被你統治。
21這下，你愛指上主向𠊎發誓，你毋會剪除𠊎个後代，毋會將𠊎个名對家族中除掉。」
22大衛就向掃羅發誓。事後，掃羅轉屋下去；大衛㧯佢个部下又轉到佢等囥个山寨去。