Bible

Psalms 40

Chinese (T) - TNV2012

1 𠊎耐心仰望上主；佢垂聽𠊎个祈求。

2 佢將𠊎對深坑㧯泥糜底背拉出來；佢將𠊎放在磐石頂，又安全又妥當。

3 佢教𠊎唱新个詩歌，就係讚美𠊎等上帝个詩歌。盡多看到个人會敬服，願意來倚靠上主。

4 全心倚靠上主个人，實在有福氣噢！佢毋拜偶像，也毋同拜假神个人共下。

5 上主—𠊎个上帝啊，你識為𠊎等做恁多大事，無人有法度㧯你比！你為𠊎等所做㧯計劃个奇妙事情，實在真多，講毋盡。

6 你無愛祭物㧯供物；你也無愛燒化祭㧯贖罪祭。反轉，你賜給𠊎聽從个耳公，

7 所以𠊎應你講：「看啊，𠊎來了！你對𠊎个指示有記在法律个書中。

8 𠊎个上帝啊，𠊎非常樂意遵行你个旨意！𠊎將你个教示記在𠊎个心中。」

9 上主啊，在你子民个聚會中，𠊎識傳揚你拯救个好消息；你知，𠊎定著會一直緊傳揚。

10 𠊎毋識將你拯救个信息暗暗囥在心中，反轉常常講起你个信實㧯救恩；𠊎毋識在大會中將你不變个慈愛㧯信實囥等。

11 上主啊，你定著毋會收回你對𠊎个痛惜；你不變个慈愛㧯信實會一直做𠊎个保護。

12 算毋盡个患難圍困𠊎；𠊎个罪逐到𠊎，使𠊎个頭那擎毋起；𠊎个罪過比頭那毛還較多，害𠊎心寒膽顫！

13 上主啊，求你施恩拯救𠊎！求你遽遽來幫助𠊎！

14 願該兜想愛收𠊎命个人失敗見笑！願想愛看𠊎受害个人退走受侮辱！

15 願該兜嘲謔𠊎講：「啊哈！好勢了！」个人，自家見笑來打亂退！

16 願所有尋求你个人因為你歡喜快樂！願一切愛慕你拯救个人緊講：「上主真偉大！」

17 𠊎係盡軟弱又窮苦个人，主啊，總係你還係顧念𠊎。你係𠊎个幫助，𠊎个拯救者；𠊎个上帝啊，求你毋好停跎！