Bible

Psalms 39

Chinese (T) - TNV2012

1 𠊎識講：「𠊎愛謹慎𠊎个行為，免得𠊎个舌乸犯罪；壞人在𠊎面前个時，𠊎愛封等嘴毋出聲。」

2 𠊎恬恬無出聲，好話也毋講；總係𠊎个痛苦越來越厲害，

3 連𠊎个底背也充滿心火。𠊎想來想去，心火緊𤏸，𠊎就開嘴講：

4 「上主啊，𠊎有好食到幾多歲？求你指示𠊎幾時愛過身呢？俾𠊎知𠊎个人生到底幾短！」

5 看啊，你使𠊎个人生只有幾巴掌長！在你看來，𠊎一生个時間差毋多係零。事實上，人生就像透一口氣恁久定定！

6 人生實際就係浮雲：無閒直掣，總係結局也係虛空；積存財寶，毋知會被麼人接去。

7 主啊，𠊎還仰望麼介？𠊎所有个盼望在你！

8 求你救𠊎脫離一切過犯，毋好俾戇檔人來嘲謔𠊎。

9 𠊎愛恬恬，無愛開嘴，因為係你使𠊎受苦。

10 求你毋好繼續責罰𠊎；𠊎被你打到半生半死！

11 你責罰人个罪惡來管教佢，使佢合意个像被蛀蟲蛀掉。實在噢，人生就像透一口氣！

12 上主啊，求你聽𠊎个祈禱，求你留心來聽𠊎个求喊；求你毋好恬恬由在𠊎噭！因為，在你面前𠊎就係一個出外人，像𠊎个列祖一樣，係世間个過路客。

13 求你毋好目瞋瞋緊䁯𠊎！在𠊎離開，無在世間以前，𠊎正有好小可享受安樂！