Bible

1 上主啊，毋好發譴來責備𠊎；求你毋好大發譴來責罰𠊎！ 2 你个箭射入𠊎恁深；你个手磧等𠊎恁重。 3 你大發譴使𠊎滿身著傷；𠊎个罪惡害𠊎骨頭痠痛。 4 𠊎个罪疊起來比𠊎个頭那較高；罪孽个重擔將𠊎磧到企毋起來。 5 因為𠊎个戇檔，傷口生膿臭掉。 6 𠊎痛到肚笥揇等，背痀痀，歸日無葛無煞，行來行去。 7 𠊎个腰身像被火燒，致到滿身著傷。 8 𠊎歸身無力，軟濟濟；心肝鬱啐，痛到緊噌。 9 主啊，你知𠊎个心願；你聽到𠊎大聲歎息。 10 𠊎心肝搏搏跳，全無元氣；𠊎个目珠也緊來緊矇。 11 親戚朋友毋肯面對𠊎个病痛；隔壁鄰舍也係共樣企到遠遠。 12 尋機會收𠊎命个設羅網；想愛傷害𠊎个又緊嚇𠊎，從早到暗設詭計對付𠊎。 13 𠊎像耳聾个，無法度聽，又像嘴啞个，無法度講； 14 𠊎成做聽毋到个人，連𠊎个嘴也毋會應。 15 上主啊，𠊎所仰望个就係你！主—𠊎个上帝啊，你定著會應𠊎！ 16 因為𠊎識求：「莫俾對敵因為𠊎發病洋洋得意；莫俾佢等因為𠊎橫落去來誇口。」 17 因為痛苦一直無離開𠊎，𠊎隨時都有可能橫落去。 18 𠊎承認自家个罪惡，又因為𠊎个罪憂愁。 19 𠊎个對敵勇壯又當有力；無緣無故怨恨𠊎个盡多。 20 以惡報善个人同𠊎作對，因為𠊎所追求个係良善。 21 上主啊，求你毋好放掉𠊎！𠊎个上帝啊，毋好離開𠊎恁遠！ 22 主啊，𠊎个拯救者啊，求你遽遽來幫助𠊎！