Bible

1 關心窮苦人个，實在有福氣！堵到患難个時，上主會救佢。 2 上主愛庇佑並保全佢个性命，使佢在這地上享受幸福；上主毋會將佢放掉，毋會俾佢落在對敵手中。 3 佢發病个時，上主愛醫治佢，俾佢恢復健康，來離開病床。 4 𠊎識講：「上主啊，求你憐憫𠊎；醫治𠊎，因為𠊎識得罪你。」 5 𠊎該兜對敵壞心議論𠊎講：「佢幾時會死，被人毋記得呢？」 6 佢等來看𠊎，就講假話；心內想愛尋𠊎个把柄；然後出去逐所在譭謗。 7 怨恨𠊎个彼此嚌嚌咀咀；佢等圖謀詭計愛陷害𠊎。 8 佢等講：「佢著到絕症；一定無可能䟘床了！」 9 連𠊎所信靠，最知己个朋友，食過𠊎个飯个，也用腳踢𠊎。 10 上主啊，求你憐憫𠊎；使𠊎勇健起來，好報復佢等！ 11 𠊎个對敵無贏過𠊎，所以𠊎就知你惜𠊎。 12 因為𠊎純正，你就扶持𠊎，使𠊎永遠企在你面前。 13 願上主—以色列个上帝受稱頌，對古早直到永遠！阿愐！阿愐！