Proverbs 11
1 上主盡惱無準个秤仔；佢當歡喜公當个秤砣。
2 驕傲來，見笑跈等來；有謙卑，就會有智慧。
3 正直个人有誠實引導佢等；奸詐个人因虛假致到滅亡。
4 在審判个日財產無麼介用；唯有公義能救人脫離死亡。
5 無好嫌个人有正義為佢鋪平平个路；邪惡人被佢自家所做个壞事來逕倒。
6 正直人个義氣會拯救佢等；奸詐人个貪心會害死自家。
7 邪惡人一死，佢个希望就消滅；佢所倚靠个勢力也變做空空。
8 正直人能對患難中得救；邪惡人反轉代佢走入去。
9 無敬虔个人用佢个話害死鄰舍；正直个人因為有智識就會得救。
10 正直人享福，全城快樂；邪惡人滅亡，大家歡喜。
11 因為正直人帶來祝福，城市就興旺；因為邪惡人所講个話，城市就毀滅。
12 嘲謔鄰舍个盡無常識；明理个人毋會加講話。
13 好傳閒話个人，毋會守祕密；心肚誠實个人，就做得信賴。
14 策略少，國家定著衰敗；參謀多，人民就有安全。
15 為生份人擔保，會受虧損；拒絕做擔保个，平安無事。
16 賢慧个婦女受到人个敬重；強暴个男人單淨得到錢財。
17 仁慈个人自家得好處；殘忍个人反轉害自家。
18 邪惡人所賺个，係虛假个工價；委公義種子个，得真實个報賞。
19 盡力行善，必得生命；追求邪惡，必致死亡。
20 心肝邪惡个，上主盡惱；行為無好嫌个，主盡歡喜。
21 邪惡人一定會受到刑罰；正直人个子孫必蒙拯救。
22 當靚總係無見識个婦女，就像豬鼻孔牶等个金環。
23 正直人个心願結出善果；邪惡人个希望惹起憤怒。
24 樂善好施，緊來緊富足；齧擦過度，反轉變貧窮。
25 慷慨施捨，更加發達；使人滿足，自家蒙福。
26 囤糧毋賣，受人咒詛；甘願賣糧，人人祝福。
27 渴慕良善，必得恩惠；尋求邪惡，禍患臨頭。
28 倚靠錢財，像秋天落葉；義人興旺，像青葉茂盛。
29 攪亂家庭个會繼承空空个風；戇檔人會成做明理人个奴僕。
30 義人个果子就係生命樹；智慧人當得人心。
31 正直人在世間有報應，何況邪惡人㧯罪人呢！