Proverbs 10
1 下背係所羅門个箴言：智慧个孻仔使阿爸快樂；戇檔个孻仔害阿姆憂愁。
2 不義个錢財無麼介好處；公義正能救人脫離死亡。
3 上主毋會使正直人肚笥枵；佢使邪惡人所想望个落空。
4 懶尸个手害人窮苦；煞猛个手帶來富足。
5 照時節來收割个，係聰明个孻仔；收成个時睡目个，係見笑个孻仔。
6 正直人个頭頂有祝福；邪惡人个嘴囥等殘暴。
7 正直人會被人紀念；邪惡人會留下臭名。
8 智慧人个心服從命令；糮糝講話个，自惹失敗。
9 行正路个，生活安安穩穩；行歪路个，一定顯露原形。
10 用目珠打暗號个，惹起麻煩；糮糝講話个，自惹失敗。
11 正直人个嘴係生命泉；邪惡人个嘴囥等殘暴。
12 仇恨惹起爭端；仁愛遮蓋過錯。
13 明理人个嘴講出智慧个話；無常識个人背囊愛受鞭打。
14 智慧人認真吸收智識；戇檔人開嘴就惹災禍。
15 財富係有錢人个城堡；貧窮係窮苦人个爛攤。
16 正直人个工價係生命；邪惡人个收入係死亡。
17 遵守教訓个，行生命个路；拒絕責備个，就走入迷途。
18 心肚囥等怨恨个係落仔；唆是非講謠言个係戇仔。
19 多言多語難免犯罪；約束嘴唇就係智慧。
20 正直人个話像特選个銀仔；邪惡人个心思無半些價值。
21 正直人个話會栽培盡多人；戇檔人因無常識害死自家。
22 上主賜福，使人好額；自家勞碌，財富有限。
23 戇檔人做壞事像準搞个；聰明个人看智慧做快樂。
24 邪惡人所驚个偏偏臨到佢；正直人个願望定著會達成。
25 風差一過，邪惡人就無掉；總係，正直人會永遠企在。
26 請懶尸人去做事，會被佢閼死，像牙齒淋到酸醋，目珠燻到煙。
27 敬畏上主，延年益壽；邪惡个人，命短福薄。
28 正直人个希望帶來喜樂；邪惡人个期待變做空空。
29 上主个道係誠實人个保障，總係使作惡个人致到滅亡。
30 正直人永遠毋會流離失所；邪惡人一定無法安居樂業。
31 正直人个話語帶來智慧；邪惡人个舌乸會受割斷。
32 正直人會講適當个話；邪惡人講話充滿欺騙。