Bible

Proverbs 9

Chinese (T) - TNV2012

1 智慧起自家个屋仔，頓七支柱𣎴，

2 㓾牛羊，調美酒，辦桌席。

3 姖差派使女出去湊人，自家在城肚最高个地方喊講：

4 「戇直个人啊，到𠊎這位來！」姖又對無智識个人講：

5 「來啊，來食𠊎个滂沛，來啉𠊎調製个美酒。

6 愛離開戇直，好好生活，愛行聰明个道路。」

7 糾正傲慢人个，會惹到羞辱；責備邪惡人个，會傷害自家。

8 毋好責備傲慢人个過錯，因為佢會恨你。你若係責備有智慧个人，佢就會敬愛你。

9 勸話智慧人，佢就更加有智慧；教導正直人，佢就會增加學問。

10 敬畏上主係智慧个開頭；認識至聖者就係聰明。

11 智慧會增加你个日子，也會使你享受長壽。

12 你若有智慧，得到好處个係你自家；你若存傲慢，損失係你自家來擔當。

13 戇檔个婦女吵吵鬧鬧，姖係當戇，麼介都毋知。

14 姖坐在自家屋下門口，坐在城肚最高个地方，

15 對該兜過路个人，對當趕路个人喊講：

16 「戇直个人啊，到𠊎這位來！」姖又對無智識个人講：

17 「偷來个水較甜，偷食个餅較香。」

18 總係戇人毋知有陰魂在姖該位；姖个人客已經跌落陰間个深壢。