Proverbs 12
1 歡喜受管教个，就係愛慕智識；當惱人責備个，就係憨蚩个人。
2 上主施恩給良善个人；佢刑罰詭計多端个人。
3 人倚靠惡行無法企穩；義人个根基毋會搖動。
4 賢慧个𡜵娘係厥老公頭那頂个冕旒；毋知見笑个𡜵娘像丈夫骨中个毒瘤。
5 正直人个計劃公正；邪惡人个計謀奸詐。
6 邪惡人个話像羅網會害人；正直人所講个話會拯救人。
7 邪惡人一橫，橫到貼貼；正直人个家，企到穩穩。
8 人得到稱讚係因為有智慧；心術邪惡个就會被人藐視。
9 地位雖然低總係有僕人，贏過硬展排場餓等肚笥。
10 正直人體恤頭牲个需要；邪惡人个憐憫還係殘忍。
11 煞猛耕種个，糧食充足；追求虛榮个，全無常識。
12 邪惡人貪壞人搶到个錢財；正直人个根帶來好个結果。
13 邪惡人因為佢犯罪个話跌落陷阱；總係正直人定著會安然脫離患難。
14 人因為講話結个果子充滿福氣；人因為手所做个會得好个報賞。
15 戇檔人恅到自家所做个盡著；總係智慧人會聽別人个勸話。
16 戇檔人容易發閼；精明人忍受侮辱。
17 講誠實話，彰顯公義；做假見證，顯出詭詐。
18 糮糝講話像利劍刺傷人；智慧人个舌乸能醫治人。
19 誠實个言語永遠受紀念；騙人个花撩盡遽就無效。
20 想做壞事个，心存詭詐；勸人和睦个，充滿喜樂。
21 正直人毋會有災害；邪惡人一直有禍患。
22 講花撩个嘴唇，上主盡惱；行為誠實个，係主所歡喜。
23 聰明人無展自家智識；戇檔人宣傳佢个憨蚩。
24 煞猛人个手會掌權；懶尸人會變做苦力。
25 人心憂慮，像㧡重擔；一句好話，使人歡樂。
26 正直人為鄰舍帶路；邪惡人害佢入迷途。
27 懶尸人無米煮；煞猛人會富足。
28 正義个路帶來生命；這條路上並無死亡。