Proverbs 13
1 智慧个孻仔聽從阿爸个教訓；總係傲慢人毋肯聽人个責備。
2 嘴出良言个人享受美福；奸詐人个慾望就係強暴。
3 謹慎講話，保全生命；好講大話，自取滅亡。
4 懶尸人妄想總係一無所得；煞猛人个心願會得到滿足。
5 正直人盡惱花撩个話；邪惡人留臭名又見笑。
6 正義保護行為純正个；總係邪惡使罪人橫倒。
7 有人假發，其實無半滴；有人詐窮，其實真好額。
8 有錢人用錢贖命；窮苦人免受恐嚇。
9 正直人个光盡明亮；邪惡人个燈會烏掉。
10 驕傲只會惹起爭端；接受勸話正係智慧。
11 橫財會像水流沙；血汗錢日日增加。
12 願望無實現，會害人傷心；美夢一成真，就像生命樹。
13 藐視教訓，自招災禍；聽從誡命，會有好報。
14 智慧人个教示係生命个泉源，有可能使人離開死亡个羅網。
15 明理人到處受人尊敬；奸詐人个路寸步難行。
16 聰明人逐儕靠智識行事；戇檔人表現佢毋知頭天。
17 奸詐个使者帶來災禍；忠心个使者帶來和平。
18 拒絕管教，帶來窮苦㧯見笑；謙卑接受勸話，會受人尊敬。
19 願望實現，心肚就當甘甜；離開邪惡，係戇人所惱个。
20 同智慧人共下行，能得智慧；㧯戇檔人做朋友，會受連累。
21 災禍緊追罪人；義人必得善報。
22 好人將產業留給子子孫孫；罪人積存錢財反轉歸義人。
23 窮人个田地，會五榖豐登；不義一來到，就剝削淨淨。
24 毋管教子女，就係無惜佢等；惜子女，就應該愛注意管教。
25 正直人食到心滿意足；邪惡人反轉枵腸餓肚。