Joshua 23
1 上主使以色列人享受太平，四周圍仇敵毋敢來作怪，已經盡久了。這時約書亞也當老了；
2 佢召集全部以色列人、長老、領袖、審判官、㧯官長來，對佢等講：「𠊎這下已經恁老了。
3 上主—你等个上帝為到你等對這兜國家所做个一切，你等全部看到了；上主—你等个上帝一直為你等戰爭。
4 𠊎已經將所有佔領㧯吂佔領个各國土地—東片對約旦河，西片到地中海—全部分配給你等各支族做產業。
5 上主—你等个上帝會使佢等離開你等；你等進攻个時，佢愛將佢等逐走。你等會照上主—你等上帝个應許，得到佢等个土地。
6 「所以，你等愛堅強，愛確實遵行摩西法律書所寫个一切命令，毋好偏左、毋好偏右。
7 你等做毋得㧯留在你等當中个外族人摻雜；做毋得提到佢等个神明，抑係奉該兜神明个名發誓；做毋得事奉它兜抑係向它兜跪拜。
8 只愛照你等到這下一直所遵行个，繼續對上主—你等个上帝忠心。
9 你等進攻个時，上主已經將當強當大个民族逐走；到今晡日無一個國家有辦法抵擋你等。
10 你等當中無論㖠儕就有辦法打贏一千儕，因為上主—你等个上帝照佢个應許會為你等戰爭。
11 你等愛細膩，愛全心敬愛上主—你等个上帝。
12 「若係你等對佢無忠心，反轉㧯留在你等當中个外族人摻雜，同佢等通婚，
13 你等進攻个時，上主—你等个上帝一定毋會再將這兜民族逐走；反轉佢等會像羅網、陷阱，像打在你等背囊个鞭仔、刺在你等目珠个竻仔，直到你等無一儕存留在上主—你等上帝所賜給你等這垤盡靚个土地。
14 「這下，𠊎過身个時間會到了。你等一心一意全部清楚，上主—你等个上帝已經將佢應許給你等所有个福氣賜給你等了。佢个應許全部有實現，無一項漏掉。
15 總係，你等愛知，就像上主—你等个上帝實現所有應許給你等个福氣，上主也會照樣降各樣个災禍，直到將你等對佢所賜這垤盡靚个土地上除滅。
16 若係你等毋遵守上主—你等上帝所命令你等个約，去事奉敬拜別个神明，佢會大發譴責罰你等，使你等當遽就對佢所賜這垤盡靚个土地上消滅。」