Joshua 24
1 約書亞在示劍召集以色列各支族。佢召集以色列个長老、領袖、審判官、㧯官長，佢等就來到上帝面前。
2 約書亞對全部民眾講：「上主—以色列个上帝恁樣講：『當久以前，你等个祖先他拉並佢个孻仔亞伯拉罕㧯拿鶴，住在幼發拉底河該片；佢等拜別个神明。
3 𠊎帶你等个祖先亞伯拉罕對該位過幼發拉底河，𢱋佢行遍迦南各地，又賜給佢盡多子孫。𠊎賜給佢以撒，
4 又給以撒兩個孻仔—雅各㧯以掃。𠊎將以東个山區給以掃，做佢个產業；總係雅各㧯佢个子孫下到埃及去。
5 「『𠊎差派摩西㧯亞倫；𠊎降大災禍給埃及；最後𠊎𢱋你等出來。
6 𠊎對埃及將你等个祖先𢱋出來；埃及人用戰車、兵馬逐佢等。你等个祖先到紅海个時，
7 佢等求𠊎救命。𠊎用烏暗將佢等㧯埃及人隔開，𠊎用海水浸掉埃及人，將佢等吞滅。𠊎對埃及所做个你等全部盡清楚。「『你等在曠野住當久，
8 後來，𠊎𢱋你等到約旦河東片，到亞摩利人所住个土地。佢等攻擊你等；總係𠊎將佢等交在你等手中，使你等得到佢等个土地。你等進攻个時，𠊎就除滅佢等。
9 後來，摩押王西撥个孻仔巴勒準備攻打你等，派人喊比珥个孻仔巴蘭來咒詛你等。
10 總係𠊎毋聽巴蘭个話，所以佢反轉祝福你等幾下擺；恁樣，𠊎就救你等脫離巴勒个手。
11 「『你等過約旦河，到耶利哥。耶利哥人攻打你等，像亞摩利人、比利洗人、迦南人、赫人、革迦撒人、希未人、耶布斯人攻打你等一樣；總係𠊎將佢等全部交在你等手中。
12 你等前進个時，𠊎使佢等著驚混亂，將兩個亞摩利王逐走；這並毋係因為你等用刀劍抑係弓箭所做成个。
13 𠊎賜給你等个土地毋係你等用勞力得來个；𠊎賜給你等个城市並毋係你等起个。你等這下就住在該位；你等食个葡萄㧯橄欖並毋係你等自家種个。』」
14 約書亞繼續講：「你等愛敬畏上主，真心誠意事奉佢。你等愛除掉祖先在美索不達米亞㧯埃及所拜个神明，單單事奉上主。
15 若係你等毋甘願事奉上主，恁樣，今晡日愛做決定，你等愛事奉㖠個：係你等祖先在美索不達米亞所拜个神明？抑係你等住這地方个亞摩利人所拜个神明？總係𠊎㧯𠊎全家，𠊎等愛事奉上主。」
16 民眾應講：「𠊎等絕對毋敢離開上主，去事奉別个神明！
17 上主—𠊎等个上帝識𢱋𠊎等个祖先㧯𠊎等離開在埃及做奴才个國家；𠊎等親眼看到佢所行个大神蹟。在𠊎等經過个國家中，無論麼介地方，佢攏總保守𠊎等安全。
18 𠊎等進入這片土地个時，上主逐走所有住在這位个亞摩利人。所以𠊎等愛事奉上主；佢係𠊎等个上帝。」
19 約書亞對民眾講：「總係你等無一定有辦法事奉上主！因為佢係神聖个上帝，係專情个上帝。佢毋會赦免你等个過犯㧯罪惡。
20 若係你等離開上主，去事奉外族个神明，雖然佢識恩待你等，佢還係會降災禍毀滅你等。」
21 民眾對約書亞講：「𠊎等決定愛事奉上主！」
22 約書亞講：「你等自家做證，證明你等決定愛事奉上主。」佢等講：「好！𠊎等自家做證。」
23 所以約書亞命令佢等：「既然恁樣，你等愛除掉所有外族个神明，決心歸向上主—以色列个上帝。」
24 民眾對約書亞講：「𠊎等決定愛事奉上主—𠊎等个上帝；𠊎等愛聽從佢。」
25 該日，約書亞為人民立約；佢在示劍將法律㧯條例交給佢等。
26 約書亞將這兜命令寫在上帝个法律書，然後在上主聖所个橡樹下頓一垤大石頭。
27 佢對全部人民講：「這垤石頭愛為𠊎等做證；它聽到上主對𠊎等所講一切个話。所以，它愛為你等做證，免得你等悖逆你等个上帝。」
28 然後約書亞喊人民逐儕倒轉自家分到个土地去。
29 這兜事以後，上主个僕人—嫩个孻仔約書亞過身；佢過身个時係一百一十歲。
30 以色列人民將佢安葬在佢分到个土地，就係迦實山北片以法蓮山區个亭拿‧西拉。
31 約書亞在世个日仔，以色列人民事奉上主；佢死掉以後，該兜親眼看到上主為以色列人所做一切事个長老還生个日仔，人民還係事奉上主。
32 以色列人民對埃及所帶出來約瑟个骸骨，安葬在示劍，就係雅各用一百隻銀幣向示劍个阿爸、哈抹个子孫買下來該垤地。約瑟个後代承接該地。
33 亞倫个孻仔以利亞撒也過身，安葬在基比亞，就係厥孻仔非尼哈所分到在以法蓮山區个細山頂。