1約書亞召集呂便、迦得，㧯東瑪拿西支族个人來，
2對佢等講：「你等已經完成上主个僕人摩西所命令你等做个逐件事，也聽從𠊎所有个吩咐。
3直到今晡日，你等毋識離開你等个以色列同胞；你等認真遵守上主—你等上帝个命令。
4這下，上主—你等个上帝已經照佢个應許，使你等个以色列同胞安居。所以，你等做得轉屋下，轉到你等所得到个土地，就係上主个僕人摩西給你等該垤在約旦河東片个土地。
5總係你等愛確實遵守上主个僕人摩西交給你等个法律誡命：敬愛上主—你等个上帝，遵行佢个道，服從佢个誡命，對佢忠心，全心全意事奉佢。」
9所以呂便、迦得、㧯東瑪拿西支族个人轉屋下去。佢等在迦南地个示羅離開其他个以色列人，向佢等自家个土地基列出發，就係佢等照上主通過摩西命令佢等去佔領个土地。
10呂便、迦得，㧯東瑪拿西支族个人來到基利綠，就係約旦河西片。佢等在河壩滣起一座高大个祭壇。
11有人㧯以色列其他支族个人講：「看哪，呂便、迦得、㧯東瑪拿西支族个人在基利綠，就係在約旦河𠊎等這片起一座祭壇！」
12以色列人一聽到這消息，全會眾都聚集到示羅，愛去攻打東片該兜支族。
13以色列人派祭司以利亞撒个孻仔非尼哈，到基列地去見呂便、迦得、㧯東瑪拿西支族个人；
14有十個以色列領袖㧯非尼哈共下去。佢等逐儕代表在約旦河西片安居个一個支族，全部係宗族个族長。
15佢等來到基列地，看到呂便、迦得、㧯東瑪拿西支族个人民，
16就代表上主个全會眾對佢等講：「你等做麼介做這壞事冒犯以色列个上帝呢？你等為自家起這祭壇，悖逆上主！你等這下無愛再聽從佢係麼？
17你等還記得𠊎等在批珥犯个罪麼？該時，上主用發瘟責罰自家个子民。𠊎等到這下還係為該件事受苦。敢講該罪還毋罅係麼？
18你等這下愛拒絕佢，毋跈佢係麼？今晡日你等悖逆上主，天光日佢就會對以色列全會眾發譴。
19若係你等个土地無淨浰，無適合敬拜上主，恁樣，過這片來，到上主个聖帳篷停留个地方來向𠊎等討兜土地。你等做毋得悖逆上主，也做毋得得罪𠊎等。做毋得在上主—𠊎等上帝个祭壇以外另外為自家起祭壇。
20你等愛記得謝拉个子孫亞干个事件。佢毋遵從命令，無毀滅應該毀滅个戰利品，以色列全會眾敢毋係為到這件事受責罰？亞干犯罪，連累別人㧯佢共下死！」
21呂便、迦得、㧯東瑪拿西支族个人，回答住在西片支族該兜族長講：
22「上帝係大能者！佢係上主！上帝係大能者！佢係上主！佢知𠊎等做麼介恁樣做；𠊎等也愛以色列人知。若係𠊎等悖逆上主，對佢無忠心，你等今晡日就俾𠊎等死！
23若係𠊎等毋遵從上主，反轉為自家起祭壇，在頂高獻燒化祭、素祭，抑係平安祭，願上主親自責罰𠊎等！
24事實毋係恁樣。𠊎等恁樣做係因為驚將來你等个子孫會對𠊎等个子孫講：『你等㧯上主—以色列个上帝有麼介關係？
25上主用約旦河做𠊎等㧯你等呂便、迦得人中間个界限；你等就㧯上主無關係。』該時，你等个子孫驚怕會禁止𠊎等个子孫去敬拜上主。
26「所以𠊎等起一座祭壇，毋係愛獻燒化祭抑係別个牲儀，
27係愛在你㧯𠊎中間，㧯世世代代，做證據，證明𠊎等確實係在上主个聖帳篷該位獻燒化祭、別个牲儀，㧯平安祭。這係愛證明𠊎等係敬拜佢个，免得將來你等个子孫講，𠊎等个子孫㧯上主無關係。
28這就係𠊎等个主張。若係將來真實發生這事，𠊎等个子孫就做得講：『看哪，𠊎等个祖先起一座祭壇，㧯上主个祭壇共樣，毋係愛獻燒化祭抑係別个祭物，係愛在你㧯𠊎中間做證據。』
29𠊎等絕對毋會悖逆上主；除了該在上主—𠊎等上帝个聖帳篷前个祭壇，𠊎等毋會起別个祭壇，去獻燒化祭、素祭，㧯別个祭物來悖逆佢。」
30祭司非尼哈㧯跈佢共下个十個領袖，就係住在約旦河西片以色列各支族該兜族長，聽到呂便、迦得、㧯東瑪拿西支族个人所講个話，全部當滿意。
31祭司以利亞撒个孻仔非尼哈對佢等講：「這下𠊎等知，上主㧯𠊎等共下；你等並無悖逆佢。所以，你等救到以色列人，使佢等毋會受上主个責罰。」
32恁樣，祭司以利亞撒个孻仔非尼哈㧯該兜領袖離開呂便人㧯迦得人，對基列地轉迦南地，去向以色列人民報告。
33以色列人民全部當滿意，又讚美上帝。佢等無再提起愛去攻打呂便人㧯迦得人、破壞佢等住个土地了。
34呂便人㧯迦得人講：「這座祭壇向𠊎等做證據，證明上主係上帝。」所以，佢等喊這座壇做「證壇」。