Jeremiah 39
1 西底家做猶大王个第九年十月，巴比倫王尼布甲尼撒帶領大軍來包圍耶路撒冷。
2 在西底家做王个第十一年四月初九，耶路撒冷城牆被佢等攻橫掉了。
3 耶路撒冷被人佔領个時，巴比倫王所有个高級將官全部到中門，在該位開庭。這兜將官包含：尼甲‧沙利薛、三甲‧尼波、撒西金㧯另外一個尼甲‧沙利薛。
4 猶大王西底家㧯佢个禁衛隊看到這情形，透夜逃出城外。佢等經過王宮花園，走過連接兩扇城牆个通路，向約旦山壢方向逃走。
5 總係巴比倫个軍隊追佢等，在耶利哥附近个平原追到西底家。佢等將佢捉起來，帶到巴比倫王尼布甲尼撒該位。該時尼布甲尼撒在哈馬地區个利比拉；佢就在該位審判西底家。
6 巴比倫王在利比拉當西底家个目珠前㓾掉佢所有个孻仔，也㓾掉猶大所有个貴族，
7 然後將西底家个兩隻目珠挖出來，用銅鍊仔鎖等佢，愛帶到巴比倫去。
8 巴比倫人放火燒掉王宮㧯民房，拆掉耶路撒冷个城牆。
9 最尾，侍衛長尼布撒拉旦將留在城肚㧯向佢投降个人全部捉到巴比倫去。
10 佢將該兜最窮苦、無財產个人留在猶大，將葡萄園㧯田地分給佢等。
11 巴比倫王尼布甲尼撒命令侍衛長尼布撒拉旦講：
12 「將耶利米尋來，好好款待佢，做毋得傷害佢。佢有麼介要求，就照佢个要求去辦理。」
13 所以侍衛長尼布撒拉旦㧯高級將官尼布沙斯班、尼甲‧沙利薛，㧯巴比倫王其他个官員喊人去，
14 將耶利米對王宮禁衛隊个拘留所放出來，交給沙番个孫仔，亞希甘个孻仔基大利，吩咐佢安排耶利米轉屋下；耶利米就轉去，住在同胞當中。
15 耶利米還被人關在王宮禁衛隊个拘留所个時，上主吩咐佢
16 去㧯古實人以伯‧米勒講：「上主—萬軍个元帥、以色列个上帝恁樣講：𠊎愛照𠊎宣佈个話毀滅這城，毋俾它繁榮。你會親目看到這件事發生。
17 總係到該日，𠊎—上主愛保護你；你毋會被人交給你所驚个人手中。
18 𠊎定著愛保護你个安全；你毋會死在刀下。你一定會保留生命，因為你信靠𠊎。𠊎—上主恁樣宣佈了。」