Jeremiah 38
1 馬坦个孻仔示法提雅、巴施戶珥个孻仔基大利、示利米雅个孻仔猶甲、瑪基雅个孻仔巴施戶珥聽到耶利米向群眾所講个話。
2 佢講：「上主講：『麼人留在這城，麼人就會因為戰爭、飢荒、發瘟來死。總係，麼人向巴比倫人投降，麼人就毋會被人㓾死，命會得保留，像拈到命共樣。』
3 上主又恁樣講：『𠊎一定愛將這城交給巴比倫王个軍隊；佢等定著會來佔領這城。』」
4 所以該兜官員去見王，對佢講：「求你處死這個人；因為佢唆慫在城肚个士兵㧯人民投降，使佢等手軟腳攋。佢所求个毋係使人民得平安，反轉會害佢等受災難。」
5 西底家王應講：「好啊！佢在你等手中，無論你等樣般處理，𠊎無法干涉。」
6 所以佢等將耶利米捉起來，用索仔將佢縋落王子瑪基雅个囤水窟肚。這囤水窟在王宮禁衛隊个拘留所底背，囤水窟無水，只有湳泥，耶利米就陷在湳泥肚。
7 該時，堵好王在便雅憫門開庭。宮廷太監，古實人以伯‧米勒聽講佢等將耶利米縋落囤水窟肚个消息，
8 就出王宮去向王陳情講：
9 「𠊎个主，𠊎个王啊，這兜人恁樣對待先知耶利米當可惡。佢等將佢縋落囤水窟肚，佢一定會餓死在該位，因為城肚已經無糧食了。」
10 所以王命令以伯‧米勒帶三十儕去，在耶利米吂死以前將佢救出來。
11 以伯‧米勒就帶這兜人到宮廷个倉庫去，尋兜爛布爛衫，然後用索仔縋落囤水窟肚，
12 喊耶利米將這兜爛布爛衫貼在脇下，免得索仔𢲸傷佢；耶利米就恁樣做。
13 佢等就對囤水窟肚將耶利米拉出來。這事以後，佢等還係將耶利米留在禁衛隊个拘留所。
14 後來，西底家王喊人帶先知耶利米到上主个聖殿个第三隻門口見佢。佢對耶利米講：「𠊎問你一個問題；你定著愛老老實實㧯𠊎講。」
15 耶利米應西底家講：「若係𠊎老實講，你一定會㓾𠊎；若係𠊎提出意見，你也毋會聽。」
16 所以西底家王私下對耶利米發誓：「𠊎指等永生上主—創造𠊎等生命个上帝發誓，𠊎絕對毋會㓾你，也毋會將你交給想愛㓾你个人。」
17 耶利米就㧯西底家講：「上主—萬軍个元帥、以色列个上帝恁樣講：若係你出去向巴比倫王个將軍投降，你就還有命；這城也毋會被人燒掉。你㧯你全家个人全部毋使死。
18 若係你毋肯出去投降，這城會落在巴比倫人个手中。佢等會放火燒城；你也無法度脫離佢等个手。」
19 總係王應講：「𠊎驚該兜投降巴比倫个猶大人民。巴比倫人可能將𠊎交給佢等，佢等會將𠊎㩢到半生死。」
20 耶利米講：「巴比倫人毋會將你交給佢等。求你聽從上主喊𠊎㧯你講个話，你就會平安無事，救到性命。
21 上主已經指示𠊎，若係你毋出去投降，
22 留在猶大王宮个宮女會被人帶到巴比倫王个將軍面前。姖等會緊講：王被身邊親信个人騙到；佢等左右佢。這下佢雙腳踏在湳泥肚；身邊个人全部離開佢。」
23 耶利米又講：「你个王妃、子女全部會被人帶到巴比倫人該位；你自家也無法度逃走。你會被巴比倫王捉到；這城會被火燒掉。」
24 西底家對耶利米講：「毋好俾人知𠊎等講个話，你正毋會死。
25 若係有官員知𠊎㧯你講過話，佢等會來尋你，對你講：『你對王講麼介，王對你講麼介，你愛老實講，𠊎等就毋會㓾你。』
26 該時，你愛㧯佢等講：『𠊎懇求王毋好將𠊎送轉約拿單个監獄，死在該位。』」
27 後來，所有个官員斷真全部來查問耶利米，佢就照王命令佢講个話應佢等。佢等無話好講，因為王㧯佢講話个內容無人聽到。
28 恁樣，耶利米被人留在禁衛隊个拘留所，直到耶路撒冷被人佔領該日。