Jeremiah 37
1 巴比倫王尼布甲尼撒立約西亞个孻仔西底家代約雅敬个孻仔約雅斤做猶大王。
2 總係西底家㧯佢个官員、並人民全部毋聽從上主吩咐先知耶利米講个話。
3 西底家王派示利米雅个孻仔猶甲㧯瑪西雅个孻仔祭司西番雅來見先知耶利米，講：「請你為𠊎等向上主—𠊎等个上帝祈禱。」
4 該時，耶利米還吂被人關入監獄，做得自由在民間出入。
5 該樣時，巴比倫个軍隊包圍耶路撒冷，總係佢等一聽到埃及王个軍隊已經對埃及出發个消息，就對耶路撒冷撤退。
6 上主—以色列个上帝吩咐先知耶利米，
7 去㧯該差派佢求問上帝个猶大王西底家恁樣講：「埃及王个軍隊出發來幫助你等，總係一定會半路倒轉埃及本地去。
8 巴比倫个軍隊會倒轉來攻城；佢等會佔領這城，放火將城燒掉。
9 𠊎—上主警告你，毋好騙自家，恅到巴比倫人一定會離開；其實佢等一定毋會離開。
10 就算你打贏來攻擊你个巴比倫軍隊，賸到睡在營肚个傷兵定定，佢等還係會䟘起來，放火燒掉這城。」
11 因為埃及軍隊緊來緊近，巴比倫軍隊就對耶路撒冷撤走，
12 所以耶利米準備離開耶路撒冷到便雅憫地方去，在親族中承接佢分到个產業。
13 總係，耶利米來到便雅憫門个時，哈拿尼亞个孫仔，示利米雅个孻仔，掌門个隊長伊利雅捉到佢。佢㧯先知耶利米講：「你想愛向巴比倫人投降，係麼！」
14 耶利米應講：「毋係，𠊎毋係愛去投降巴比倫人！」總係伊利雅毋聽，就將耶利米捉起來，交給官員。
15 該兜官員向耶利米大發譴，喊人打佢，將佢關在宮廷書記約拿單个屋肚；這間屋舍已經改做監獄。
16 耶利米被人關在地牢，關盡久。
17 後來，西底家王派人帶耶利米到佢該位去。佢在王宮私下問耶利米：「有上主个信息麼？」耶利米應講：「有！你會被人交在巴比倫王个手中。」
18 接等，耶利米問西底家王：「𠊎麼介所在得罪你㧯你个官員抑係人民呢？你等做麼介將𠊎關在監獄肚呢？
19 該兜預言巴比倫王絕對毋會來攻打你等，毋會來侵佔這國家个先知這下在㖠位呢？
20 𠊎个主，𠊎个王啊，求你聽𠊎請求，毋好將𠊎送轉書記約拿單个屋下去，免得𠊎死在該位。」
21 所以，西底家王命令將耶利米關在禁衛隊个拘留所；佢留在該位，日日分到一垤對做餅街送來个餅，直到城肚个餅全部食淨淨。恁樣，耶利米就留在禁衛隊个拘留所。