Jeremiah 40
1 耶利米被尼布甲尼撒个侍衛長尼布撒拉旦在拉瑪放掉以後，上主對佢講話。耶利米識被鍊仔鎖等，㧯所有被人捉到巴比倫去个耶路撒冷並猶大人民共下被人帶到拉瑪。
2 侍衛長將耶利米喊到塍頭，對佢講：「上主—你个上帝宣佈愛毀滅這所在，
3 這下上主已經照佢所講个做，使災禍臨到了；因為你等得罪上主，毋聽從佢个命令。
4 這下𠊎解開你手項个鎖鍊，俾你自由。若係你想愛去巴比倫，做得㧯𠊎共下來去，𠊎會好好照顧你。若係你毋想愛去，就毋使去。全地攏總在你面前，你看麼介所在較好，就做你去！」
5 耶利米還吂應佢，尼布撒拉旦又講：「你轉到沙番个孫仔，亞希甘个孻仔基大利該位去較好！巴比倫王已經指派佢做猶大地區該兜城市个總督。你做得留在佢該位，住在你同胞當中。若係你歡喜到別个所在，也做得隨你个意思去。」侍衛長就送耶利米禮物㧯糧食，放佢走。
6 耶利米就到米斯巴去尋亞希甘个孻仔基大利，㧯佢並留在該地方个同胞共下住。
7 該兜無投降个猶大官員㧯士兵聽到巴比倫王指派亞希甘个孻仔基大利做猶大地區个總督，管理無被人捉到巴比倫去个男人、婦女、細人仔，就係該兜最窮苦个人。
8 所以這兜官員—包含尼探雅个孻仔以實瑪利、加利亞兩個孻仔約哈難㧯約拿單、單戶默个孻仔西萊雅、尼陀法人以斐該兜孻仔，㧯瑪迦人耶撒尼亞—帶領部下到米斯巴去見基大利。
9 沙番个孫仔、亞希甘个孻仔基大利向佢等保證講：「你等毋使驚愛服事巴比倫人；做你等住在這位，服事巴比倫王，就會平安無事。
10 𠊎愛親身留在米斯巴；巴比倫人來个時，𠊎會做你等个代表。你等做得收存酒、熱天个果子、橄欖油，住在你等所佔个城鎮。」
11 這時，走到摩押、亞捫、以東、㧯其他逐所在一切个猶大人，聽講巴比倫王准賸到个猶大人住在猶大地區，並設立沙番个孫仔、亞希甘个孻仔基大利做佢等个總督，
12 大家就對逃難个逐所在，轉到猶大地區。佢等到米斯巴去見基大利，又在猶大收盡多酒㧯熱天个果子。
13 這事以後，加利亞个孻仔約哈難㧯無投降个軍隊指揮官到米斯巴去見基大利，
14 㧯佢講：「你知亞捫人个王巴利斯派尼探雅个孻仔以實瑪利來暗殺你嗎？」亞希甘个孻仔基大利毋相信這個話。
15 後來，加利亞个孻仔約哈難在米斯巴暗中㧯基大利講：「請准𠊎去將尼探雅个孻仔以實瑪利㓾掉，無人會知係麼人做个。樣好由在佢暗殺你呢？若係你被人㓾死，在你周圍个人會散掉去；賸到个猶大人民全部會滅亡。」
16 總係亞希甘个孻仔基大利對加利亞个孻仔約哈難講：「𠊎毋准你恁樣做。你冤枉以實瑪利了！」