Bible

1 𠊎个兄弟姊妹啊，你等毋好恁多人做教師，因為知𠊎等做教師个一定會比別人受較嚴个審判。 2 𠊎等大家都常常有過失；若有人在言語上無過失，佢就係一個完全个人，有法度控制佢个全身。 3 𠊎等將馬啣鐵放在馬嘴底背，喊馬順服，就能控制牠全身。 4 你看，船雖然恁大，又被大風吹等走，總係用一支細細个船舵就能控制它个方向，照舵公个意思行。 5 像恁樣，舌乸雖然盡細，總係會講大話。看啊，細細个火能燒淨大大个森林！ 6 舌乸像火一樣，在𠊎等个百體中，它係罪惡个世界，會害𠊎等歸身打垃圾；它會用對地獄來个火來焚燒𠊎等人生个路程。 7 人有辦法制伏各種个走獸、飛禽、昆蟲，㧯水族；事實上，各種个動物也已經被人制伏了。 8 總係，無人能制伏舌乸；它係無法制伏个惡物，充滿害死人个毒氣。 9 𠊎等用舌乸感謝主—𠊎等个天父，又用舌乸咒詛上帝照自家个形像所造出來个人。 10 感謝㧯咒詛全部對共張嘴出來！𠊎个兄弟姊妹啊，這係盡毋應該个！ 11 共隻泉源能同時湧出甜水㧯苦水嗎？ 12 𠊎个兄弟姊妹啊，無花果樹會打橄欖嗎？葡萄樹也會打無花果嗎？鹹个泉水毋會流出甜水來。 13 你等中間有聰明智慧个人麼？若有，佢就應該用謙卑㧯智慧个好行為，來表現佢當靚个生活。 14 你等心中若有惡毒个嫉妒㧯自私，你等就毋好再自誇㧯講花撩；這係悖逆真理个事。 15 這種个智慧毋係對天頂來个，係屬地个，屬情慾个，屬魔鬼个。 16 㖠位有嫉妒㧯自私，㖠位就會有混亂㧯各種邪惡个行為。 17 顛倒，對頂高來个智慧有幾樣特色：第一係純潔，然後係和平、溫和、好參詳，充滿慈悲，能結出豐富个善果，毋會偏心，也毋會虛假。 18 促進和平个人係用和平來委種，就收割公義个果子。