1你等中間个衝突㧯冤家係對㖠位來个呢？係對你等底背相爭个慾望來个！
2你等貪圖，得毋到就想愛㓾人；你等嫉妒，得毋到就衝突㧯冤家。你等得毋到，因為你等無求上帝。
3你等求也得毋到，因為你等个動機毋著；你等所求个係想愛浪費在宴樂中。
4你這兜無忠心个人啊！敢講你等毋知同世界做朋友就係同上帝做對敵嗎？麼人想愛同世界做朋友，就係做上帝个敵人！
5聖經講：「上帝放在𠊎等底背个靈有極強个慾望。」你等恅到這句話無麼介意思嗎？
6總係，上帝所賜个恩典還較強，像聖經所講：上帝阻擋驕傲个人，賜恩典給謙卑个人。
7所以，你等愛順從上帝。愛抵抗魔鬼，魔鬼就會閃走。
8你等親近上帝，上帝就會親近你等。有罪个人啊，愛潔淨你等个手！三心兩意个人啊，愛潔淨你等个心！
9你等愛傷心，悲哀，流目汁；愛將笑聲變做哀噭，將歡喜變做悲傷！
10愛在主个面前謙卑，佢就會高升你等。
11兄弟姊妹啊，毋好互相批評。批評抑係論斷兄弟姊妹个，就係批評、論斷法律。你若係論斷法律，你就毋係行法律个人，係做審判者。
12上帝係惟一个立法者㧯審判者；只有佢正能拯救，能毀滅。你係麼人，樣敢論斷別人啊！
13愛細膩噢！你等有人講：「今晡日抑係天光日，𠊎等來去某某城，在該位住一年，做生理賺大錢。」
14事實上，你等連天光日會樣般都毋知！你等个生命像麼介呢？係像濛煙一樣，出現一下仔就毋見掉。
15你等應當恁樣講：「主若肯，𠊎等就能生下去，做這樣事，做該樣事。」
16這下，你等竟然拿肨風个事來誇口；這種誇口係邪惡个。
17所以，人若知善，毋去行，就係佢个罪。