Isaiah 49
1 眾海島个人啊，你等來聽！遠方个萬民啊，你等全部來聽𠊎講！𠊎出世以前，上主已經揀選𠊎；𠊎還在母胎肚，佢已經喊𠊎个名。
2 佢使𠊎个話像利劍；佢親手保護𠊎。佢將𠊎造成像磨尖个箭，囥在佢个箭袋肚。
3 佢對𠊎講：以色列啊，你係𠊎个僕人；𠊎定著會因為你得到榮光。
4 𠊎就講：𠊎煞猛做事，總係全無效果；𠊎盡力做，還係無採工。總係上主會給𠊎公平个論斷；𠊎个上帝定著會獎賞𠊎。
5 在𠊎出世以前，上主已經指派𠊎做佢个僕人；愛𠊎使雅各家歸向佢，使四散个以色列人民聚集在佢个面前。上主看𠊎做尊貴；𠊎个上帝係𠊎个力量。
6 上主對𠊎講：𠊎个僕人啊，𠊎愛你復興雅各个逐支族，將賸到个以色列子孫帶轉來。𠊎還愛你成做萬國个光，使𠊎个救恩達到地極。
7 以色列个救贖者—神聖个上帝恁樣講：該被人看輕、被萬國所惱个、被統治者看做奴僕个，這下君王會在你面前企起來致敬；官長也會向你跪拜。這事一定會成就，因為以色列神聖个上帝揀選你；上主定著會實現佢个應許。
8 上主對佢个子民恁樣講：接納个時節一到，𠊎就答應你；拯救个日仔一來，𠊎就幫助你。𠊎愛保護你，看顧你，通過你㧯萬民立約。𠊎愛俾你轉到該荒掉个地方，俾你重建家園。
9 𠊎愛對被人捉去个講：你等自由了！對烏暗中个人講：你等重見光明了！佢等會像羊仔在草埔食草；原旦光光个高山成做牠兜个草場。
10 佢等毋會餓肚也毋會嘴渴。日頭當𤊶乜毋會傷害佢等；因為該痛惜佢等个愛帶領佢等；佢愛𢱋佢等到有泉水个所在。
11 𠊎愛在眾山頂開路，𠊎个大路也愛坉到高高。
12 看啊！𠊎个子民會對遠方來；對西，對北，又對希尼个地方來。
13 天啊，愛歡喜唱歌！地啊，愛快樂歡呼！眾山啊，愛大聲頌揚！因為上主愛安慰佢个子民，愛憐憫佢受苦个子民。
14 總係耶路撒冷个人民講：上主已經㧒掉𠊎等！𠊎等个主已經毋記得𠊎等！
15 所以，上主應講：阿姆會毋記得姖食乳个孲𤘅仔麼？姖會毋惜親生个孻仔麼？就算阿姆毋記得自家个細人仔，𠊎也定著毋會毋記得你！
16 耶路撒冷啊，𠊎將你个名刻在巴掌心；你个城牆一直在𠊎眼前。
17 愛重建你个當遽就會轉來了；愛毀滅你个㧯害你荒涼个當遽就會離開你。
18 打開目珠四面看看仔啊！你个同胞已經集合，愛倒轉你這位來了！𠊎—上主指等𠊎个生命保證：你會看自家个同胞做尊貴，就像新娘展繫在姖腰間个珠寶。
19 你个國家識受到破壞；這下它忒狹、容納毋落轉來个人住。以前侵略你个人定著會遠遠離開你。
20 該兜你恅到喪掉个，佢等个子女會倒轉來對你講：這垤土地實在忒狹了；𠊎等需要較大个地方！
21 該時你會對自家講：麼人為𠊎𫱔這恁多細人仔？𠊎个細人仔全部夭折，𠊎已經毋會𫱔了；𠊎逃走在外背，逐所在流浪，係麼人𢱋大這兜細人仔呢？在𠊎孤單个時，這兜細人仔對㖠位來个？
22 至高个上主對佢个子民講：看啊！𠊎愛向列國擎手、向萬民搖大旗；佢等會揇等你个孻仔，揹等你个妹仔轉來。
23 列國个君王會做你子女个養爺；佢等个王后會做你細人仔个乳𡟓。佢等會在你面前跪拜，舐你腳項个塵灰。該時你就會知𠊎係上主；等𠊎幫助个人絕對毋會失望。
24 你對勇士手中樣搶得轉戰利品呢？你對佔領者手中救得轉被佢捉去个人嗎？
25 上主恁樣應講：這種事會發生了。勇士搶去个戰利品會搶轉來；佔領者捉去个人會救轉來。你个對敵就係𠊎个對敵；你个子女𠊎愛拯救。
26 𠊎愛使欺負你个人食自家个肉；佢等愛啉自家个血，醉到橫橫落去。該時普天下全部會知，𠊎係拯救你个上主；𠊎係你个救贖主，係雅各大能个上帝。