Isaiah 48
1 雅各家个人啊，愛聽這個話！你等稱做以色列人，係猶大个子孫。你等指上主个名發誓，自稱係敬拜以色列个上帝；其實你等無誠實，也無正直。
2 你等還恅到自家係聖城个人民，所倚靠个係以色列个上帝—上主、萬軍个元帥。
3 上主對以色列講：𠊎早就預言先前个事；𠊎講出嘴，又講到明明；到時𠊎忽然間出手，使該兜事情完成。
4 𠊎知你盡硬殼，頸筋像鐵，額頭像銅恁硬。
5 𠊎早就預言你个將來，在事情發生前已經宣佈，使你做毋得講這兜事係假神做个，係你自家雕刻㧯鑄造个偶像所註定个。
6 𠊎所預言个事全部發生了；你愛承認𠊎个預言正確。這下𠊎愛㧯你講將來个新事，係頭擺囥等你毋知个事。
7 𠊎到這下正使這兜新事發生；這兜事從古到今你毋識聽過；所以你做毋得講，你早就知了。
8 無毋著，你無聽過；無毋著，你並毋知；無毋著，你个耳公從來毋識打開。𠊎早就知你个詭詐；你一出世就係悖逆个人。
9 為到愛使人讚美𠊎个名，𠊎暫時忍等𠊎个受氣；𠊎強強忍等，無愛毀滅你。
10 𠊎試煉你，總係無像在火爐中煉銀仔；𠊎係用苦難做火爐來鍛鍊你。
11 𠊎恁樣做係為到𠊎自家。𠊎無愛俾自家个名受到褻瀆；𠊎定著毋將𠊎个榮耀歸給假神。
12 雅各家啊，聽𠊎講！𠊎所呼召个以色列人啊，愛聽𠊎講！𠊎係上主—獨一無二个上帝，𠊎係開始个，也係結束个。
13 𠊎親手建立地个基礎；𠊎用正手展開天空。𠊎召集天㧯地，天㧯地就黏時企在𠊎面前。
14 你等全部愛集合，來聽𠊎講話！毋識有神明預言，𠊎所選立个人會攻擊巴比倫人；佢會照𠊎个旨意在巴比倫行事。
15 係𠊎對佢講話，呼召佢；𠊎帶佢出來，使佢興旺。
16 行兼到𠊎面前來，聽𠊎講話！𠊎一開始就公開向你等講話，又使𠊎个話句句實現。這下至高个上主已經將佢个靈賜給𠊎，差派𠊎。
17 以色列神聖个上帝，拯救你个上主恁樣講：𠊎係上主—你个上帝；為到你个利益，𠊎教你；𠊎指示你應該行个路。
18 𠊎樣般希望你一直聽𠊎个命令啊！若係你聽𠊎个命令，平安就像河壩水恁樣，毋會斷掉；公義就像海浪恁樣，一陣又一陣接等來。
19 你个子孫會像沙仔恁多；𠊎永遠毋會俾佢等个名滅掉。
20 你等愛對巴比倫出來！對巴比倫人當中離開！大聲歡喜來報這好消息；到天涯海角去傳揚講：上主已經拯救佢个僕人以色列！
21 上主帶領佢个子民行過沙漠个時，佢等並無渴死；因為佢使磐石流出水來；佢打裂磐石，泉水就湧出來。
22 上主講：作惡个人毋會有平安！