Bible

1 上主恁樣講：你等恅到𠊎逐走你等个阿姆；㧯𠊎講，離婚書在㖠位？你等恅到𠊎出賣你等給債主；到底𠊎將你等賣給麼人呢？你等被人出賣係因為你等个罪；你等个阿姆被人㧒掉係因為你等个罪過。 2 𠊎來救你等个時，做麼介無人在？𠊎喊你等，做麼介毋應𠊎？你等恅到𠊎个手忒短、忒軟弱，無力好救你等係麼？看啊！𠊎發出命令，海就會燥掉；𠊎使大河壩變做沙漠，使魚類因為無水就死掉、臭掉。 3 𠊎有辦法使天變烏暗，像著麻衫為死人哀傷。 4 至高个上主教𠊎應該講个話，使𠊎知愛樣般安慰憂傷个人。逐朝晨，佢喊醒𠊎，使𠊎盡想愛聽佢个教示。 5 至高个上主使𠊎聽到佢个教示；𠊎並無違背，也無退走。 6 𠊎由在人打𠊎个背囊，挷𠊎个鬍鬚，呸口潾在𠊎个面項；𠊎一直忍受人个侮辱。 7 佢等个侮辱毋會傷害𠊎，因為至高个上主幫助𠊎。𠊎當勇敢來忍受一切，知𠊎毋會致到見笑。 8 因為上帝在𠊎身邊，代𠊎伸冤，有麼人敢來㧯𠊎打官司？𠊎等做得共下來去尋審判官！盡量告𠊎啊！ 9 至高个上主愛親自代𠊎辯護；麼人有辦法證明𠊎有罪呢？告𠊎个人全部會消滅，像舊衫褲被蟲蛀掉。 10 你等當中，麼人係尊重上主、聽從佢僕人教訓个人呢？就係在烏暗中行，還係會信靠上主，倚靠上帝。 11 想愛謀害別人个，會被自家个陰謀害到。上主恁樣規定：這種人一定會堵到災難！